“Qalatasaray”, nəhayət, bu yayın ilk transferini reallaşdırıb. Son çempion İngiltərə təmsilçisi “Bernli”dən Lesli Uqoçukvunu icarə əsasında heyətinə qatıb.

"Football-plus.az" xəbər verir ki, gənc yarımmüdafiəçi dünən axşam saatlarında xüsusi təyyarə ilə Atatürk hava limanına gələrək İstanbula ayaq basıb. Tibbi müayinə zamanı bir problem çıxmasa, transfer ən qısa müddətdə klub tərəfindən rəsmən açıqlanacaq.

Maddi detallara gəlincə, fransalı futbolçunun birillik icarəsi “Cim-Bom”a təxminən 6 milyon avroya başa gələcək. Amma “Qalatasaray” onu daimi əsasda transfer edə bilmək hüququnu da ələ keçirib. İlk ehtimallara görə bu maddənin qüvvəyə minməsi üçün Uqoçukvu ən azı 25 rəsmi oyuna çıxmalıdı. Bu şərt yerinə yetirilsə, Türkiyə çempionu gələn yay ingilislərə daha 23 milyon avro ödəyərək onu daimi şəkildə heyətinə qatacaq!

İddialara inansaq, bu futbolçunu çox bəyənən Okan Buruk transferdə israr edib. 191 sm boya malik olan 2004-cü il təvəllüdlü futbolçu fiziki göstəriciləri ilə diqqəti çəkir. Uqoçukvu Fransanın Renn şəhərində doğulub və eyniadlı klubun yetirməsidi. Peşəkar karyerasına da bu klubda start verib. Gənc yaşına rəğmən, həm Liqa-1-də, həm də avrokuboklarda oynamaqla Avropa nəhənglərinin diqqətini çəkən bu futbolçu 2023-ün avqustunda təxminən 27 milyon avroya “Çelsi”yə transfer olunub. Ancaq rəqabət səviyyəsinin yüksək olduğu London təmsilçisində yalnız 15 rəsmi oyuna çıxaraq növbəti mövsüm “Sauthempton”a icarəyə verilib. Ötən yay “Bernli” onu 28,7 milyon avroya “Çelsi”dən heyətinə qatıb. Amma bu klub, bilindiyi kimi, premyer-liqada yerini qoruya bilməyərək çempionşipə yuvarlanıb.

Uqoçukvu müdafiəyəmeyilli mərkəz yarımmüdafiəçisidi. İkili mübarizələrdə uğurlu oyunu ilə yadda qalır. Ucaboy olsa da, hərəkətlidi və rəqib hücumlarının qarşısını kəsməyi gözəl bacarır. Ötən mövsüm “Bernli”nin heyətində 38 rəsmi oyunda iştirak edərək hesabına 3 qol yazan Uqoçukvu cəmi 22 yaşı olmasına baxmayaraq, premyer-liqada artıq 73 oyuna çıxıb və 4 qol, 2 məhsuldar ötürmə ilə fərqlənib. Bundan başqa, o, Fransanın aşağı yaş qruplarından ibarət komandalarında 30-dan çox oyuna çıxıb. Yəni gənc yaşına rəğmən, bu futbolçunun yetərincə təcrübəsi var.

Uqoçukvunun “Qalatasaray”ın yarımmüdafiəsini və Okan Burukun əlini bir xeyli gücləndirəcəyi gözlənilir. Hərçənd ola bilər ki, “Qalatasaray” həm də Lukas Torreyranın ayrılmaq ehtimalını nəzərə alaraq bu mövqeni gücləndirib. Çünki təcrübəli uruqvaylı futbolçunun bu yay komandanı tərk etməsi ehtimalı yüksəkdi.