Qadın voleybolçular arasında son ölkə çempionatının qalibi "Azərreyl", heç şübhəsiz, yenə iddialıdı.

"Football-plus.az" xəbər verir ki, “Dəmiryolçular” oktyabrın 17-də mövsümün ilk rəsmi matçında Çağırış kubokunun 1/32 finalı çərçivəsində "Balta" ilə qarşılaşacaq. Avrokubokdakı oyunlar və yeni mövsüm barədə "sarı-qaralar"ın kapitanı Aynur İmanova ilə söhbətləşdik.

- Yeni mövsümə hazırlıq necə gedir?
- Çox yaxşı. Özümə və komandama güvənirəm. İstər avrokubok, istərsə də çempionat oyunlarında qarşılaşacağımız hər rəqibə qarşı fərqli hazırlaşırıq. Həmçinin də rəqibin oyunlarını təhlil edirik.

- Demək olar ki, bu mövsüm yenilənmiş "Azərreyl" izləyəcəyik. Komandaya yeni qoşulanlar Bakıya və kollektivə uyğunlaşa bilir?
- Bəli, əvvəlki illərə baxsaq, son illərdə "Azərreyl"in dəyişdiyini görürük. Düzdü, oyunçuların əksəri legionerlərdi. Bu da limitin aradan götürülməsi ilə bağlıdı. Əlbəttə, Bakıya və komandaya yavaş-yavaş uyğunlaşırlar.

- Çempionata və avrokuboklara neçə faiz hazırsız?
- İndi bütün hazırlığımızı Çağırış kubokundakı oyunumuza yönəltmişik. Neçə faiz deməyim, amma məqsədimiz yaxşı oyun göstərib qalib gəlməkdi.

- 3 gün sonra Çağırış kubokunda Ukrayna "Balta"sına qarşı vacib oyuna çıxırsız. Bu görüşdəki şanslarınız nə qədərdi?
- Düzdü, bizim üçün çox vacib oyundu. Klub olaraq bu mövsüm ilk rəsmi oyunumuzdu. Yerli komandalarla yoldaşlıq oyunları keçirmişik, amma rəsmi matç başqadı. Şansımızı yüksək görürəm.

- Rəqibi nə dərəcədə təhlil eləmisiz?
- "Balta"nın bir-iki videosu bizdə var. Ancaq rəqibi təhlil etmək üçün əlimizdə olan material azdı. Rəqibin oyun qurucusunun hansı oyunçu ilə çox oynamasına, hansı voleybolçunun qəbulda zəif olmasına və bir çox elementlərə baxmalıyıq. Ukraynalılar haqda əlimizdə az informasiya olmasına baxmayaraq, əlimizdən gələni edib qalib gələcəyik.

- Hər iki görüşdə qalib gələcəyinizə inanırsız?
- İnanıram ki, biz udacağıq. Başqa yolu yoxdu.

- "Azərreyl"in bu mövsümdəki hədəfləri nədi?
- İlk öncə hədəfimiz Çağırış kubokudu... Əlbəttə, sonra da ölkə çempionu olmaq.

- Səncə, bu mövsüm maraqlı çempionat izləyəcəyikmi?
- Bəli, çempionat maraqlı olacaq. Bunun da səbəbi legionerlərin çox olmasıdı. Belə olanda da rəqabət güclü olur.

- Ölkə çempionatında hansı rəqibi "Azərreyl" üçün çətin sayırsan?
- "Abşeron"la "Buta"ya qarşı təlim-məşq toplanışı zamanı oyunlar keçirmişik. Qalan rəqiblərin matçlarını görməmişəm. Buna görə də nəsə deyə bilmərəm.

- 34 yaşlı Aynur İmanova daha neçə il voleybol oynamaq niyyətindədi?
- Bunu ilk soruşsan siz deyilsiz. Artıq o qədər soruşublar ki... Tək bir cavab verirəm, harda qırılar, qırılar... Onda da gedəcəm (gülür).

- Bundan sonra milli karyeranı davam etdirmək istəyirsən?
- Əlbəttə, böyük fəxrlə. Millidə oynamaq böyük qürür və şərəfdi.

CAVİD ƏLİYEV