Məlum olduğu kimi, ölkəmizin futzal yığması ötən cümə DÇ-2024-ün elit mərhələ oyununda Qazaxıstana 2:4 uduzmaqla qrupdakı durumunu xeyli çətinləşdirdi.

"Football-plus.az" xəbər verir ki, Futzal Federasiyası baş məşqçi Vitali Borisovun qarşısına DÇ-yə vəsiqə qazanmaq vəzifəsi qoyub. Amma buna qrup lideri kimi nail olmaq nəinki çətin, hətta mümkünsüz görünür. Hazırda daha çox qrupda 2-ci yeri tutan ən yaxşı komandalar sırasına düşməyə ümid edirik. Bunun üçün Qazaxıstan səfərindən əlverişli nəticə ilə qayıtmaq lazımdı. Qeyd edək ki, yığma növbəti oyununu sabah keçirəcək.

Qazaxıstana məğlubiyyətin səbəblərini öyrənmək, qrupdan çıxmaq şanslarımızı dəyərləndirmək üçün yığmanın qapıçısı Rövşən Hüseynli ilə əlaqə saxladıq. Hazırda “Atrau”nun şərəfini qoruyan futzalçı Qazaxıstan futzalına yaxından bələddi.

- Qazaxıstanla oyunlar dünya çempionatına vəsiqə baxımından əsas şans kimi dəyərləndirilirdi. Səncə, ilk oyunda məğlubiyyətin səbəbi nə oldu?
- Qrup lideri olmaq şansımız azalmış ola bilər. Amma ən yaxşı nəticə göstərmiş qrup ikinciləri sırasına düşməyimiz üçün təkcə bizim qrupun deyil, başqa qruplardakı komandaların nəticələri də önəmlidi. Bildiyiniz kimi, sonda 4 qrupun ən yaxşı ikinciləri növbəti mərhələyə çıxacaq. Yenicə aldığımız məlumata görə, müəyyən qayda pozuntularına yol verdikləri üçün Gürcüstan və Ermənistan millilərinin xalları sıfırlanıb. Bu səbəbdən artıq demək olar ki, Finlandiya və Portuqaliya növbəti mərhələdədi. Geridə qalan 4 qrupun 3 komandası üçün şanslar qalıb. Məğlubiyyətin əsas səbəbi isə bəzi epizodlarda anlaşılmazlığın yaranması, diqqətsizlik ucbatından rəqibə çox boşluqlar verməyimiz oldu. Buraxdığımız qollar hamısı öz səhvlərimizə görə idi.

- Son vaxtlar Qazaxıstan futzalının inkişafı göz önündədi. Onlarda olub bizdə olmayan nə var? Bizim inkişafımıza hansı amillər mane olur?
- Qazaxıstandakı futzalın inkişafı ilk növbədə çempionatlarının səviyyəsi ilə bağlıdı. Onların çempionatında klubların sayı da daha çoxdu. Bizim liqada komanda sayı 6, onlarda isə 11-di. Azərbaycanda liqa 4 dövrəlidi, yekunda çempion olan komanda 20 oyun keçirmiş olur. Qazaxıstanda isə reqlament tam fərqlidi. Orda biz eyni rəqiblə həftədə iki dəfə qarşılaşırıq. Təkcə çempionat oyunlarını nəzərə alsaq, hər komanda mövsüm ərzində 40 oyun keçirmiş olur. Yekun nəticəyə əsasən pley-offa vəsiqə qazanmış komandalar final mərhələsinə qədər də əlavə oyun keçirirlər. Bu o deməkdi ki, həmin klublar bir mövsüm ərzində təxminən 56 oyun keçirirlər. Oyun sayının çoxluğu futzalçılara ideal vəziyyətlərini qoruyub saxlamağa imkan verir. Çempionatın ev-səfər prinsipi ilə keçirilməsi, azarkeş sayının çoxluğu, bölgələrdə futzala olan maraq, təbii ki, sonda idmanın bu növünün sürətli inkişafına gətirib çıxarır. Qazaxıstan çempionatında çıxış edən 11 klubun, demək olar ki, hamısı müxtəlif şəhərləri təmsil edirlər. Bu da azarkeşlərdə əlavə maraq yaradan amillərdən biridi.

- Qazaxıstanla səfər oyunundan gözləntiniz nədi? Açığını desək, Bakıdakı oyundan sonra futbol ictimaiyyəti arasında cavab oyunu ilə bağlı ciddi narahatlıq var, hətta darmadağın ola biləcəyimiz deyilir. Bəs siz cavab oyununa hansı ümidlərlə gedəcəksiz?
- Təbii ki, oyunla bağlı müxtəlif fikirlər var. Məğlub olacağımızı düşünənlər də var, səfərdən yaxşı nəticə ilə qayıdacağımıza inananlar da. Biz Qazaxıstana maksimum nəticə üçün yollanırıq. Qarşımıza qoyulan hədəf dünya çempionatına vəsiqə əldə etməkdi. Bu hədəfə çatmaq üçün əlimizdə gələni edəcəyik. Evdəki oyunda yol verdiyimiz səhvləri təkrarlamamağa çalışacağıq. Artıq rəqibi lazımi səviyyədə təhlil etmişik, boşluqlarına yaxşı bələdik.

- Son oyunda iştirak etmədin. Meydanda olsaydın, fərqli nəticə qazana bilərdiz?
- Son oyunda iştirak etməməyim zədəli olmağımla bağlıdı. Hətta Rumıniya ilə oyundan əvvəl zədə almışdım, məşqlərə və oyunlara ağrıkəsici iynələrin hesabına çıxırdım. Bunu etməyimin səbəbi ideal formamı itirmək istəməməyim idi. Oynamamağımın səbəbi kimi tək zədəni göstərmək istəmirəm. Bu həm də məşqçilər korpusunun qərarı idi. Qərara hörmətlə yanaşıram, hər halda, məqsəd məni qorumaq və riskə atmamaqdı. Nəticəyə təsir edə bilərdimmi? Bu barədə danışmaq üçün gecdi, oyun artıq geridə qalıb.

ADİL NƏHMƏTLİ