Arne Slotla bağlı şayiələrə birdəfəlik son qoyulub. O, iş yerini dəyişməyəcək.

"Football-plus.az" xəbər verir ki, İngiltərə mənbələri son günlər niderlandlı məşqçinin yeni mövsümdən “Tottenhem”i çalışdıracağını yazırdı. Lakin belə vəziyyətə adekvat reaksiya verən “Feyenoord” rəhbərliyi baş məşqçi ilə müqaviləni yeniləyib. Bu mövsüm komandanı Niderland erediviziyasında çempionluğa daşıyan 44 yaşlı mütəxəssisin sözləşməsinin müddəti 2026-cı ilin yayına qədər artırılıb. Bu barədə klubun rəsmi saytı məlumat yayıb.

Rotterdamlıları 2021-ci ildən çalışdıran Slot müqaviləni yeniləməzdən əvvəl KİV-ə belə açıqlama verib: “Bir çox klubun mənimlə maraqlanması haqda xəbərləri eşitmişəm. Bunlar mənim üçün xoş olsa da, “Feyenoord”da qalmaq istəyirəm. Bir il əvvəl start verdiyimiz işi davam etdirmək niyyətindəyəm. Mənim komandadan getməyim haqda ehtimal ciddi deyil. Rəhbərliklə son görüşümüzdə yeni müqavilə haqda fikir mübadiləsi aparmışıq. Aramızda başqa mövzuda müzakirə olmayıb. “Feyenoord”da yeni mövsümdəki çıxışımızı səbirsizliklə gözləyirəm”.