Son günlər İtaliya yığmasının baş məşqçi vəzifəsi ilə bağlı xəbərlərin sayı-hesabı yoxdu. Nəhayət, bir neçə gün əvvəl bu postda daimi işləyəcək mütəxəssisin kimliyi böyük ölçüdə müəyyənləşmişdi. Lakin gözlənilən təyinat vaxtında baş tutmayıb. Səbəb isə heç də idmanla bağlı deyil. Hadisələri xronoloji ardıcıllıqla nəzərdən keçirək.

"Football-plus.az" xəbər verir ki, “Skuadra adzurra”nın baş məşqçi vəzifəsi mart ayından boşdu. Cennaro Qattuzo komandanın seçmə pley-off mərhələsində Bosniya və Hersoqovinaya uduzaraq DÇ-2026-ya vəsiqə qazana bilməməsindən sonra istefa vermişdi. Yığmaya iyunda keçirilən iki yoldaşlıq matçında ölkənin gənclərdən ibarət komandasını çalışdıran Silvio Baldini rəhbərlik etmişdi. İtaliya iyunun 3-də Lüksemburqa, iyunun 7-də isə Yunanıstana 1:0 hesabıyla qalib gəlmişdi. Onu da yada salaq ki, milli komandanın ardıcıl 3-cü (!) dəfə mundiala çıxa bilməməsi bu yay İtaliya Futbol Federasiyasının (İFF) rəhbərliyində də dəyişikliyə səbəb olub. Böyük təzyiqə tab gətirməyib istefaya yollanan Qabriele Qravinanın boşaltdığı prezident kürsüsünə Covanni Malaqo seçilib.

İFF-nin yeni rəhbərliyi dünya çempionatı boyunca və nəhəng turnir sona çatandan sonra baş məşqçi probleminin həlli üçün müxtəlif yollara əl atıb. Vakant posta yerli və xarici ölkələrdən olan bir çox tanınmış mütəxəssisin namizədliyi nəzərdən keçirilib. Əlbəttə, Xosep Qvardiolanın adının hallanması dünya futbol ictimaiyyətinin də marağına səbəb olmaya bilməzdi. Lakin “Mançester Siti”dəki onillik möhtəşəm fəaliyyətini başa vurandan sonra hazırda işsiz olan ispaniyalı mütəxəssisin məsələsində çətinlik vardı. Cümə günü onun İtaliya yığmasının baş məşqçi vəzifəsinə təyinatının alınmaya biləcəyi məlum olub. “La Gazzetta dello Sport”un yaydığı xəbərə görə, tərəflər arasında əsas problem maliyyə məsələsi olub. 55 yaşlı çalışdırıcı ilə 20 milyon avro maaş tələb edib. Bu məbləğ isə İFF-nin təklif etməyə hazır olduğu məvacibdən təxminən iki dəfə çoxdu. Federasiyanın texniki direktoru Paolo Maldini danışıqların davam etdiyini desə də, hələ ki yekun razılığın əldə olunmadığını bildirib. Qvardiolanın ailəsi ilə birlikdə Barselonada daha çox vaxt keçirmək istəyi də danışıqları çətinləşdirən amillərdən biri hesab olunub. Həmin xəbərdə bildirilib ki, milli komanda baş məşqçisiz qalandan sonra federasiya əvvəlcə Karlo Ançelotti ilə əlaqə saxlayıb. Lakin təcrübəli mütəxəssis Braziliya yığmasında qalmağa qərar verib. Bundan sonra əsas namizəd kimi Qvardiolanın adı ön plana çıxıb. Lakin şənbə günü Pepin də yaxın gələcəkdə İtaliyada işləməyəcəyi müəyyənləşib. Bəzi mənbələr “Yuventus”dan istefaya göndəriləndən sonra heç bir yerdə işləməyən Tyaqo Mottanın “skuadra adzurra”ya mümkün təyinata isti yanaşmadığını da xəbər verib.

Bir andaca milli komandaya Andrea Pirlonun təyinat alacağı məlum olub. Məşhur insayder Fabritsio Romanonun məlumatına görə, tərəflər arasında şifahi razılıq əldə olunub. 46 yaşlı mütəxəssislə müddəti 2030-cu ilin yayına qədər nəzərdə tutulan müqavilə imzalanacaq. Pirlonun başçılıq edəcəyi məşqçilər heyətinə sabiq komanda yoldaşı Roberto Baronionun da daxil olacağı gözlənilirdi. Yeri gəlmişkən, DÇ-2006-nın qalibinin sonuncu, daha doğrusu, hazırkı iş yeri Birləşmiş Ərəb Əmirliklərinin (BƏƏ) “Dubay Yunayted” klubudu. Pirlo daha əvvəl “Yuventus”, “Sampdoriya” və “Fatih Karagümrük”ün baş məşqçi postunu da tutub.

Amma bazar günü ortaya ciddi bir problem çıxıb. İtaliyanın istehlakçı hüquqlarını müdafiə edən “Codacons” təşkilatı Pirlonun Rusiya mərc şirkəti ilə sponsorluq əməkdaşlığına görə araşdırma aparılmasını tələb edib. “Corriere dello Sport”un iddiasına görə, bu əməkdaşlıq Pirlonun milli komandanın baş məşqçi vəzifəsinə mümkün təyinatı ilə bağlı mübahisələr yaradıb. “Codacons” bununla bağlı Rabitə Məsələləri üzrə İdarəyə (AGCOM) rəsmi şikayət edəcəyini açıqlayıb. Təşkilat bildirib ki, Pirlo yığmanın baş məşqçisi təyin olunacağı halda, bu qərarın dayandırılması üçün məhkəməyə də müraciət edəcək. “Codacons” rəhbərliyi hesab edir ki, sabiq məşhur futbolçunun mərc şirkətinin reklam siması kimi fəaliyyəti İtaliya qanunvericiliyinə ziddi. Şikayət təmin olunarsa, Pirlo sponsorluq müqaviləsinin dəyərinin 20 faizi həcmində cərimələnə də bilər.

Əlbəttə, səbəbkarın bu məsələyə münasibəti də maraq doğururdu. 47 yaşlı mütəxəssis sosial şəbəkə hesabında paylaşdığı açıqlamada adının Rusiya mərc şirkəti ilə əməkdaşlığı səbəbindən mübahisələrə səbəb olmasından təəssüfləndiyini deyib. Pirlo bildirib ki, mərc şirkəti ilə əməkdaşlığı BƏƏ-də işlədiyi dövrdə yaranıb, yalnız kommersiya və idman xarakteri daşıyıb və buna siyasi məna qatılması doğru deyil. O, karyerası ərzində həmişə çalışdığı ölkələrin qanunlarına və imzaladığı müqavilələrə uyğun fəaliyyət göstərdiyini vurğulayıb. Pirlo paylaşımında artıq yığmanın baş məşqçi vəzifəsinə namizəd olmadığını da açıqlayıb:

Yeri gəlmişkən, yığmanın sabiq qapıçısı və nümayəndə heyətinin rəhbəri Canluici Buffon komandaya qayıtmaq təklifini qəbul etməyib. Bu barədə “La Gazzetta dello Sport”un məlumatında bildirilir. İFF-nin yeni texniki direktoru Paolo Maldini ona milli komandada əvvəlkindən daha fəal vəzifə təklif edib. Sabiq qapıçı təklifi dinləsə də, sonda imtina qərarı verib. Qeyd edək ki, Buffon daha əvvəl də İtaliya yığmasının strukturunda çalışıb. O, vəzifəsini Qattuzo ilə birlikdə, komanda DÇ-2026-ya vəsiqə qazana bilmədikdən sonra tərk etmişdi.

Əlavə edək ki, Pirlonun gözlənilən təyinatının baş tutmamasının İFF-nin texniki direktoru Paolo Maldini və onun məsləhətçisi Leonardonun istefaya yollanmasıyla müşayiət oluna bilər.