Türkiyənin elita təmsilçisi ''Göztəpə'' mühüm bir satışla diqqət mərkəzinə düşüb. İzmir təmsilçisinin braziliyalı forvardı Juan Santos yeni mövsümü Rusiyada keçirəcək.

Belə ki, ''Göztəpə'' ilə ÇSKA arasında anlaşma əldə olunub. Superliqada əcnəbi investorlara məxsus yeganə klub statusunda olan ''Göztəpə''nin sahibi ''Sport Republic'' şirkətidi. ''Sarı-qırmızılar'' bu şirkətin əlinə keçdikdən bu yana həm sabitlik yaxalayaraq elitaya yüksəliblər, həm də hər yay bir bahalı satış həyata keçirirlər.

''Göztəpə'' 24 yaşlı Juan Santosu ötən mövsümün qış transfer dönəmində ''Lill''ə satmaqdan imtina etmiş və 15 milyon avroluq təklifi geri çevirmişdi. Ancaq bu dəfə Rusiya klubunun rəsmiləri eyni məbləğ qarşısında transferi başa çatdırmağa müvəffəq olublar. Anlaşmada 15 milyon avrodan başqa bonuslar da mövcuddu. ''Göztəpə'' hazırda Sloveniyada toplanışdadı. Son matçlarda məşqçilər korpusu zədə amilini nəzərə alaraq transfer üzündən bu futbolçunu demək olar, oynatmırdı. Juan Santosun artıq komanda yoldaşları və məşqçilərlə vidalaşaraq toplanışı tərk etdiyi bildirilir.

Maraqlıdı ki, ''Göztəpə'' bu hücumçunu 2024/25-də ''Sauthempton''dan icarəyə götürmüş, ötən yay isə cəmi 900 min avro ödəyərək onu daimi əsasda transfer etmişdi. Hərçənd ''Sauthempton'' özü də ''Sport Republic'' şirkətinə məxsusdu. Juan geridə qoyduğumuz mövsümdə 32 superliqa matçında 11 qol, 4 məhsuldar ötürməlik diqqətçəkən performans sərgiləmişdi.

Xatırladaq ki, ''Göztəpə'' ötən yay bir başqa braziliyalı forvard Romulonu 20 milyon avro qarşılığında ''Leyptsiq''ə göndərərək tarixinin ən bahalı satışını reallaşdırmışdı.