"Bəzən həyatda ən çətin qərar insanın ən çox sevdiyi yerdən ayrılması olur. Bu gün böyük qürur və kövrəklik hissi ilə doğma komandam - "Şahdağ Qusar"la vidalaşıram. Bu klubda mən təkcə futbol oynamadım, həm də böyük bir ailənin üzvü oldum. Birlikdə çətinliklərdən keçdik, mübarizə apardıq və Allahın köməyi, komandamızın əzmi, siz dəyərli azarkeşlərin dəstəyi ilə 2-ci liqanın çempionu olduq. Bu uğur bütün komandamızın, bütün Qusarın və həmişə yanımızda olan azarkeşlərin uğurudu. Doğma torpağımı və insanlarımızı təmsil etmək mənim üçün həmişə böyük qürur olub. Həyat isə bəzən insanın qarşısına yeni yollar çıxarır. Klub rəhbərliyi ilə yaranan fikir ayrılığı səbəbindən komandadan ayrılmaq qərarı verdim. Bu, heç vaxt bu kluba olan sevgimin və bağlılığımın azalması demək deyil. Birlikdə çalışdığım komanda yoldaşlarıma, məşqçilərimizə və bizi həmişə dəstəkləyən əziz azarkeşlərimizə ürəkdən təşəkkür edirəm. Harda olsam da, "Şahdağ Qusar"ın uğurlarına sevinəcək və özümü həmişə bu ailənin bir parçası hesab edəcəyəm".

“Əlbəttə, mən gələndə klubun vəziyyəti yaxşı deyildi. Köhnə sponsor klubdan imtina etmişdi, klub dağılmaq üzrə idi. Bu məsələ ilə bağlı Futbolun İnkişaf Fondunun rəhbərliyi ilə birgə oturub yeni plan qurduq. Məqsəd “Şahdağ Qusar”ın yaşaması idi. Həm biz, həm də Fond əlindən gələni etdi ki, klub dağılmasın, yaşasın və birinci liqada layiqincə çıxış etsin. Pis-yaxşı çempionata başladıq. Düzdü, vəziyyətimiz o qədər də yaxşı deyildi, amma yenə də müəyyən səviyyədə komanda yığa bilmişdik. Düşünürəm ki, pis çıxış etmədik. Sadəcə, mövsümün ilk yarısında problemlərimiz çox idi, əsasən də maliyyə problemləri. Yanvardan sonra kluba yeni sponsor və yeni rəhbərlik gəldi. Bundan sonra maliyyə vəziyyəti və ümumilikdə komandanın durumu yaxşılaşdı, yeni futbolçular cəlb edə bildik.

Nəticədə çempionatın ikinci yarısında çox yaxşı çıxış etdik. Hətta 3-cü yerə yüksəlmək şansımız da var idi. Ümumilikdə isə planımız təkcə bu mövsüm üçün deyildi, gələn mövsümdə də “Şahdağ Qusar”ı premyer-liqa səviyyəsində çıxış edəcək, hətta çempionluğa oynayacaq komanda halına gətirmək istəyirdik. Bu barədə rəhbərliklə də danışmışdıq. “Şahdağ Qusar”dan ayrılmaq fikrim yox idi. İstəyirdim komandada qalım, dəstək olum və “Şahdağ Qusar”ı premyer-liqaya qaytaraq. Azarkeşlər buna layiqdi. Ancaq çempionat bitəndən sonra rəhbərliklə aramızda fikir ayrılığı yarandı. Mən başqa cür düşünürdüm, onların isə fərqli planları var idi, bu fikirlər üst-üstə düşmədi. Nəticədə ayrılmaq qərarı verdim. Bu o demək deyil ki, mən qalsaydım, mütləq uğur olacaqdı. Bəlkə mən olmayanda da komanda premyer-liqaya yüksələ bilər. “Şahdağ Qusar” doğma komandamdı, ayrılsam da, uğurlarına həmişə sevinəcəyəm. Amma qeyd etdiyim kimi, ayrılmağımın əsas səbəbi rəhbərliklə fikir ayrılığı oldu”.