Qətərdə keçirilən cüdo üzrə dünya çempionatı bir neçə gün öncə başa çatıb. Dohada təşkil olunan mundial gələn il Parisdə təşkil olunacaq Yay Olimpiya Oyunları ərəfəsində cüdoçularımız, məşqçilər üçün son ciddi sınaq idi.

Qətərdə keçirilən yarışa 13 cüdoçu ilə qatılmışdıq ki, onlardan 9-u kişi, 4-ü zərif cinsin nümayəndəsi idi. Qadın cüdoçularıın fəxri kürsüyə yüksələcəyi əvvəlcədən gözlənilmirdisə, kişilərə ümid böyük idi. Təəssüf ki, ümidlər puça çıxdı. 100 kq-da güləşən Zelim Kotsoyevin “bürünc”ünü nəzərə almasaq, cüdoçularımızın çıxışını yalnız bir sözlə ifadə etmək olar – fiasko. 73 kq-da mübarizə aparan Hidayət Heydərov medalın bir addımlığında dayandısa, 81-də əsas qızıl ümidimiz Səid Mollayi ilk görüşdəcə “ağ bayraq” qaldırmaqla etimadı doğrultmadı. İl ərzində cüdoçularımız çoxsaylı turnirlərdə iştirak edir, demək olar hər ay hardasa yüksək səviyyədə təlim-məşq toplanışı keçir. Cüdo Federasiyası bunun üçün yüzminlərlə vəsait xərcləyir. Bəs nəticə niyə yoxdu? Deməli, bu günə kimi “Böyük dəbilqə” və başqa beynəlxalq yarışlarda qazanılan medallar heç də səviyyənin göstərici deyilmiş. Bizim cüdoçuların biabirçılığı fonunda gürcülər Dohada 4 medal qazandı ki, bunun da ikisnin əyarı qızıl oldu. Görəsən, gürcülər cüdoya daha çox sərmayə qoyur, yoxsa biz? 19 yaşlı Georgi Sardalaşvili ölkəsi üçün “bürünc” qazanır, biz isə “milliləşdirilən” Mollayidən medal gözləyirik və ona yatırım edirik. 9 kişiyə bir bürünc – sözün əsl mənasında rəzalət.

Yuxarıda qeyd etdiyim kimi, Cüdo Federasiyası cüdoçular üçün hər cür şərait yaradıb. Turnirlərə qatılırlar, xaricdə təlim-məşq toplanışı keçirlər. Heç bir cüdoçu maliyyə problemindən də şikayət edə bilməz. Bir sözlə, hər şey yüksək səviyyədədi. Ancaq bunun qarşılığı bir “bürünc”dü.

Bir ildən artıqdı ki, cüdo yığmasına alman Riçard Trautman rəhbərlik edir. Mark van der Ham isə performans direktoru vəzifəsini icra edir. Düzü, hələ də mənə qaranlıqdı ki, performans direktorunun səlahiyyətinə nə daxildi? Onun işini qiymətləndirmək üçün hansı meyarlara, nəyə qiqqət yetirmək lazımdı? Görünən odu ki, Qətərdəki dünya çempionatında yığmanın ən titullu cüdoçusu Səid Mollayi ilk görüşdəcə mübarizəni dayandırır. Burdan belə qənaətə gəlmək olar ki, yığma üzvlərinin performansı heç də yerində deyil. Düzdü, almaniyalı və niderlandlı mütəxəssislərin yığmadakı işinə Paris-2024 qiymət verəcək. O da məlumdu ki, reytinq cədvəlindəki xallara görə cüdo yığmamız Fransa paytaxtına tam heyətlə yollanacaq. Ancaq Olimpiada ərəfəsindəki son dünya çempionatında yaşanan uğursuzluq federasiya rəhbərliyi üçün həyəcan təbili olmalıdı. Əks halda, Dohadakı biabırçılığın davamı Parisdə yaşanacaq.

RƏŞAD