Milli komandalar üçün ayrılan fasilə başa çatdı. Həftəsonu premyer-liqanın 21-ci turunun matçları keçirildi.

Gərgin mübarizəyə səhnə olan qarşılaşmalarda maraqlı nəticələr qeydə alınmaqla yanaşı, qeyri-adi proseslər də baş verdi. Tur ərzində diqqətimizi çəkən ən maraqlı məqam oyunların başlama saatı ilə bağlı oldu. Məsələn, “Qəbələ”nin baş məşqçisi Elmar Baxşıyev matç haqda fikirlərinə bu cümlələrlə başladı:

Artıq yaz aylarında olduğumuzu nəzərə alıb, Elmar bəyin fikirlərində həqiqət payı olduğunu deyə bilərik. Görəsən, matçlar nə üçün erkən saatlarda başlayıb? Bundan əlavə, qarşılaşmalar zamanı bir sıra müəmmalı qayda pozuntuları yaşandı. Elə “Neftçi” - “Zirə” matçında əllə oyun nəzərdən qaçdı, 2 qırmızı vərəqə verildi, qarşılaşmanın sonunda 11 metrlik cərimə zərbəsi təyin olundu. Deyirdilər ki, mövsümün ikinci yarısından sonra premyer-liqada VAR-dan istifadə ediləcək. Artıq 3-cü dövrə də başa çatdı, amma bu sistemdən xəbər-ətər yoxdu. Görəsən, bu il VAR-ı görə biləcəyik? Maraqlı suallarımız çox olsa da, özümüz bunlara cavab verə bilmərik. Bu səbəbdən də PFL-in Texniki İdman Departamentinin rəhbəri Elgiz Abbasovla əlaqə saxladıq.

- Premyer-liqanın 21-ci turunun görüşləri erkən saatlarda başladı. Bunun səbəbi nədi? Halbuki qış aylarında görüşlər 19.00, 20.00-da başlayırdı...

- Oyunların erkən saatlara salınması deyəndə nəyi nəzərdə tutursuz? Ümumiyyətlə, matçların hansı saatda başlamasını PFL çempionatın yayın hüququna malik “CBC Sport”la müzakirələrdən sonra açıqlayır. Bu normaldı. Çünki “CBC Sport” təkcə Azərbaycan çempionatının görüşlərini yayınlamır. Amma istənilən halda yekun qərar PFL-ə məxsusdu. Aprelin ilk günlərində saat 16.00-da oyunun başlamasında (Qəbələdə 15.00-da başladı – red.) qeyri-adi hal yoxdu. Bu, aprelin sonunda və ya mayın əvvəlində olsaydı, sizlə razılaşardım. Amma əlbəttə, yaya doğru getdikcə, havalar isindikcə oyunların başlama saatı da buna uyğun olacaq. Bir şərtlə ki, stadionun infrastrukturu görüşlərin gec saatda başlamasına imkan versin.

- Bizdə olan məlumata görə, 22-ci turda bir görüş istisna olmaqla, qalan 3 qarşılaşma gec saatlarda start götürəcək. Bunun səbəbi nədi?

- Yenə deyirəm, havalar isindikcə oyunların gec saatda start götürməsi normal haldı.

- Hazırda müqəddəs Ramazan ayındayıq. Futbolçular, məşqçi heyəti oruc tutur. Klublar matçların iftardan sonraya salınması ilə bağlı PFL-ə müraciət etməyib? Ümumiyyətlə, belə bir təklif olsa, nəzərə alınmaq ehtimalı var?

- Fürsətdən istifadə edib, Ramazan ayının gəlişi ilə bağlı hamını təbrik edirəm. Açığı, bununla bağlı klublardan bizə müraciət olmayıb. Əvəzində biz klublara müraciət edərək, oyunçuların oruc tutub-tutmadıqları, tutacaqları haqlda buna oyun günü də riayət edib-etməyəcəkləri, oruc tutanların sayı ilə maraqlanmışıq. Bir tur ərzində hər iki qarşılaşmanın iftardan sonraya təyin olunması mümkün deyil. Amma PFL olaraq belə həssas məqamları həmişə nəzərə almışıq. Mümkün qədər kömək etməyə çalışacağıq.

- Redaksiyamıza daxil olan məlumata görə, premyer-liqanın 22-ci turunda “Keşlə” - “Neftçi” matçı saat 14.00-da start götürəcək. Bu o deməkdi ki, qarşılaşma Şamaxıda olacaq?

- Hazırda bu haqda nəsə deyə bilmərəm. Məsələ ilə bağlı PFL-in rəsmi saytında məlumat veriləcək.

- Premyer-liqanın 3-cü dövrəsi də başa çatdı. Sona 7 tur qalıb. Mövsümün ikinci yarısından sonra çempionatda VAR-dan istifadə olunacağı deyilmişdi. Premyer-liqada bu sistemi görə biləcəyik? Ümumiyyətlə, VAR-ın qurulması yolunda stadionlarda hansısa problem var?

- VAR sisteminin Azərbaycan premyer-liqasında tətbiqi gözlənilən yeniliklərdən biridi. Bunun nə vaxt gerçəkləşəcəyi ilə bağlı növbəti müsahibələrdə daha ətraflı danışa bilərik.

İLKİN SULTANLI