Azarkeşlər martın 26-da keçirilən "Qarabağ" - "Qalatasaray" (1:2) matçından sonra ikinci dəfə qardaşlıq oyununa şahidlik etdi. Bu dəfə "Beşiktaş"la "Sabah" üz-üzə gəldi. Görüş futbolsevərlər tərəfindən həyacanla gözlənilirdi. Əldə olunacaq gəlirin zəlzələdən zərərçəkənlərə göndərilməsi də Azərbaycanla Türkiyə arasındakı özünəməxsus bağın növbəti göstəricisi idi.

Mayın 12-də İstanbul təmsilçisi Heydər Əliyev Beynəlxalq Hava Limanında böyük coşqu ilə qarşılanmışdı. Fanatlar komandanı və klub rəsmilərini "Hilton" otelinə qədər müşayiət etmişdilər. Qardaşlıq oyunundan əvvəl isə hər iki klubun rəhbərləri arasında görüş keçirilib. Görüşdə AFFA-nın baş katibi Sərxan Hacıyevlə PFL prezidenti Elxan Səmədov da iştirak etdi. Dostluq yeməyindən sonra "Beşiktaş"ın vitse-prezidenti Engin Baltacı "Sabah"ın prezidenti Maqsud Adıgözəlova "Beşiktaş"ın formasını bağışlayıb. Daha sonra klubların rəsmiləri Fəxri xiyabanı, Şəhidlər xiyabanını və Türk Şəhidliyini ziyarət edib...

Azarkeşlər start fitinə az qalmış stadiona axışmağa başladı. Asayiş keşikçiləri ciddi yoxlamadan sonra növbədə duranları içəri buraxırdı. Tribunalarda qaldırılacaq plakatlar, əşyalar tək-tək nəzərdən keçirilirdi. Xüsusilə qeyd edim ki, qardaşlıq matçını izləmək istəyənlərə həm də Türkiyə bayraqları paylanırdı. "Qalatasaray" - "Qarabağ" matçından fərqli bu dəfə "Fənərbaxça" və "Trabzonspor"un formalarını geyən azarkeşlərin sayı da az deyildi. Komandalar isə meydana şəhid ailələrinin, qazilərin və zəlzələdən əziyyət çəkənlərin övladları ilə çıxdı. Üzərində Türkiyə və Azərbaycan bayraqları əks olunan, həmçinin "Bir millət, iki dövlət!" şüarı yazılan nəhəng pankart da açıldı. Hər iki dövlətin himni səslənərkən azarkeşlər bir nəfər kimi ayağa qalxdı.

Stadionda əsl futbol bayramı yaşanırdı. Azarkeşlərin hər dəfə 44-cü dəqiqədə səsləndirdiyi "Şəhidlər ölməz, vətən bölünməz" şüarı bu dəfə ilk dəqiqələrdə tribunaları ağuşuna aldı. Qardaşlıq oyunu "Sabah"ın vurduğu iki ardıcıl qolla başladı. "Soldati di Sabah" fanklubu bu dəfə də komandanı tək qoymamışdı. Tribunaların əksəriyyətinin "Beşiktaş" azarkeşi olduğu hiss olunsa da, fanklub son ana qədər varlığını hiss etdirdi. Aleksey Kaşukun dubl etməsi Azərbaycan təmsilçisinin tərəfdarlarını elə ilk dəqiqələrdən ayağa qaldırdı. Qardaşlıq oyununa yaraşan haldı ki, nə "Beşiktaş", nə də "Sabah" tərəfdarları buraxılan qollara qəzəbli və ya məyus halda reaksiya vermirdi. Tribunalardan birində Türkiyə prezidenti Rəcəb Tayyip Ərdoğanın plakatının da bir neçə dəqiqə nümayiş etdirilməsi diqqətimizdən yayınmadı. Matç boyunca, demək olar ki, bütün tribunalarda həyəcan davam etdi. Azarkeşlər hər iki komandanın yıxılan və ya zədələnən futbolçusuna eyni mərhəmət hissi ilə reaksiya verirdi.
Matç bitəndən sonra "Beşiktaş" azarkeşləri futbolçularla şəkil çəkdirmək üçün sıraya durdu. Qardaş ölkə təmsilçiləri onların hər birinə xüsusi önəm verərək istəklərini yerinə yetirməyə çalışırdı. Stadiondan çıxarkən halı pisləşən və yerə yıxılan Umut Meraş da diqqətdən yayınmadı. Futbolsevərlər onun durumu haqda məsul şəxslərdən cavab almağa çalışırdı. Umut dərhal təcili tibbi yardımla xəstəxanaya çatdırıldı. Yeri gəlmişkən, "Sabah"dan aldığımız məlumata görə, onun vəziyyəti yaxşıdı və artıq Türkiyəyə dönüb.

Sözügedən oyunda 6 qol vurulsa da, qalib müəyyənləşmədi. Azarkeşlərlə bu haqda söhbət edərkən məlum oldu ki, hesab onları qane edib. "Sülh"ün qardaşlıq matçına yaraşdığını deyənlər bunun təsadüf olduğunu düşünür. Azarkeşlərin fikrincə, hər iki komanda qol şanslarından yararlanmağa çalışıb, lakin bəxt elə "sülh"ün tərəfində imiş.

Bu oyun Azərbaycan futbol tarixində istənilən cəhətdən müsbət əhval-ruhiyyə ilə yadda qaldı. Burda hakim səhvləri, azarkeş intriqası, hesabın qane edib-etməməsi ciddi müzakirə edilmədi. Matçdan sonra sosial şəbəkələrdə də vəziyyət sabit idi. Mübahisə edən, qeyri-etik davranış sərgiləyən, qarşı tərəfi ittiham edənlər yox idi. Həqiqətən bu, bir qardaşlıq matçı idi...

KƏNAN BAHADIR