Misli premyer-liqasının 33-cü turunda “Turan Tovuz”un “Neftçi”ni 4:0 hesabıyla darmadağın etdiyi görüşdən öncə yaşananlardan xəbəriniz var.

Qarşılaşmadan öncə “Forza Neftçi”nin bir üzvü içkili olub. Bu səbəbdən də onu Tovuz şəhər stadionuna buraxmayıblar. Buna etiraz edən fanklubun qalan üzvləri oyuna baxmadan Bakıya qayıdıb. Məsələ ilə bağlı redaksiyamıza yeni informasiyalar daxil olub. Sən demə, hadisənin təfərrüfatı tam başqa imiş. Amma nələrin yaşandığını təfərrüfatı ilə diqqətinizə çatdırmayacam. Çünki bu məsələni böyütməyin mənası yoxdu. Həm “Turan Tovuz”un, həm də “Neftçi”nin yaxşı təşkilatlanmış azarkeşləri var. Ölkə futboluna yeni-yeni maraq yaranır. Məsələni bu şəkildə uzadaraq hər iki tərəfdə qıcıq yaratmağa ehtiyac yoxdu.

Dediyim kimi, hadisədən öncə nələrin yaşandığını diqqətinizə çatdırmayacam. Amma mənə çatan məlumata görə, “Forza Neftçi”nin üzvləri stadionu tərk edərkən “Turan Tovuz”un rəhbər şəxslərindən biri polis əməkdaşlarından xahiş edib ki, qonaqlara güzəşt etsinlər. Lakin təhlükəsizliyi təmin edən şəxslər içkili azarkeşdən başqa hamının arenaya buraxılmasına icazə verildiyini söyləyib. Belə olan halda “Forza Neftçi”nin üzvləri qərara etiraz olaraq rayonu tərk etmək qərarı verib. Hətta “boz qurd”un rəhbərliyi polis əməkdaşlarından güzəştə getməyi istəsə də, bu, mümkün olmayıb.

Əslində burda kiçik anlaşılmazlıq olub. Mediada bu məsələ xüsusi qabardıldı. Lakin buna ehtiyac yoxdu. Həm “Turan Tovuz”, həm də “Neftçi” azarkeşləri ölkə futboluna rəng qatır. Rəqabət, mübarizə, gözəl oyun olduğu çempionatda belə hadisələrin yaşanması normaldı. İndi hamı əl-ələ verib idmanın bu növünün inkişafına kömək olmalıdı. Belə problemlər isə bu prosesin baş verməsinə mane olur. Bu mövsüm dəfələrlə Tovuz şəhər stadionuna oyunları işıqlandırmaq üçün yollanmışam. Klub rəhbərliyi, rayon camaatı həm jurnalistlərə, həm də qonaq komandanın azarkeşlərinə hörmətlə yanaşıb. Hətta dəfələrlə olub ki, arenanın diktoru “qonaq komandanın futbolçularına, azarkeşlərinə uzun yol qət edərək rayonumuza təşrif buyurduqları üçün təşəkkür edirik” sözlərini səsləndirib. Rəqiblərə belə jestlər edən klubun başqa fanatlara münasibətdə hörmətsizlik etməsi isə mümkün deyil. Əminəm ki, növbəti dəfə “Neftçi” Tovuza səfər edərkən azarkeşlər rəqib fanatları alqışlarla qarşılayacaq. Və bu məsələ birdəfəlik unudulacaq.

İLKİN SULTANLI