“Turan Tovuz” Bakıda yaşananlara görə “Neftçi”dən qisas alıb - AÇIQLAMALAR
Premyer-liqanın 33-cü turunun “Turan Tovuz” - “Neftçi” matçı söz-söhbətə səbəb oldu.
Meydan sahiblərinin 4:0 hesablı qələbəsi futbol gündəmini dəyişdi. Oyun ətrafında başverənlər də müzakirə mövzusu oldu. Flaqmanın əsas azarkeş dəstəkçisi olan “Forza Neftçi” Tovuz şəhər stadionuna təşrif buyurmuşdu. Lakin azarkeşlər arenaya buraxılmayıb. Buna fanatlardan birinin pivə içməsi səbəb olub. Stadionun təhlükəsizliyi təmin edən polislər həmin şəxsi arenaya buraxmayıb. Bu səbəbdən də “Forza Neftçi”nin bütün üzvləri içəri girməkdən boyun qaçırıb. Yəni azarkeş yoldaşı ilə həmyərlik nümayiş etdiriblər.
Məsələ ilə bağlı redaksiyamıza maraqlı informasiya daxil olub. Sən demə, problem martın 5-də başlayıb. Həmin vaxt premyer-liqanın 25-ci turunda “Neftçi” ilə “Turan Tovuz” üz-üzə gəlirdi. Oyundan öncə həm polislər, həm də flaqman azarkeşləri tovuzluların stadiona buraxılmasına problem yaradıb. Bu səbəbdən də “Turan Tovuz” fanatları arenaya girməkdə gecikib. Onlar matçın müəyyən hissəsini izləyə bilməyib. Məhz bu üzdən də Tovuzda keçirilən görüşdə bir növ bunun qisası alınıb. Əldə etdiyimiz məlumata görə, klub rəhbərliyi polislərdən “Neftçi” azarkeşlərinin xüsusi yoxlanılmasını xahiş edib. Asayiş keşikçiləri də onların istəyini nəzərə alıb. Azarkeşlərdən birinin içkili olması məsələnin bu həddə çatmasına səbəb olub.
Ümumiyyətlə, dünyada və əsasən də Avropada istənilən şəxs futbol matçını izləməyi özü üçün istirahət sayır. Həm qadınlar, həm də kişilər əllərində “fast-food” qidalar, içkilər ilə gərgin mübarizə şəraitində keçən görüşləri izləyir. Orda spirtli içkidən istifadəyə də icazə verilir. Heç uzağa getməyək. Bakıda keçirilən AÇ-2020-nin oyunlarında da bunun şahidi olmuşuq. Öz ölkələrinə azarkeşlik edən fanatlar əllərində alkoqollu içkilərlə stadiona daxil olurdu. Hətta arenanın özündə belə səyyar satış təşkil edilmişdi. Azərbaycan teokratik ölkə də deyil ki, spirtli içkilərin satışı və istifadəsi qadağan olunsun.
Görəsən, premyer-liqanın Əsasnaməsində “spirtli içki qəbul edən şəxsin stadiona daxil olması qadağandı” bəndi və ya qaydası var? Sualımızı PFL-in media və marketinq direktoru Sənan Abdullayevə ünvanladıq: “Əsasnamədə bununla bağlı bənd yoxdu. Təhlükəsizliyə meydan sahibi komanda cavabdehdi və bunu həmişə polisin köməyi ilə həyata keçirir. Polislərin isə təhlükəsizliyi təmin etmək üçün öz təlimatları var”.
Açıqlamadan belə aydın olur ki, premyer-liqanın Əsasnaməsində “içkili halda stadiona girmək olmaz” bəndi yoxdu. Lakin təhlükəsizliyi təmin edən polis həmin şəxsin arenaya girib-girməməsinə qərar verə bilər. Görəsən, həqiqətən “Neftçi” azarkeşi içkili olub? Flaqmanın Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevin suala cavabı belə oldu:
“Oyundan öncə hansısa azarkeş saxlanılmayıb. Sadəcə, görüşü izləmək istəyənlərdən birindən spirt iyi gəlib. İçkili olmayıb. Oyundan öncəki gecə ad günündə olub. Həmin məclisdə içki qəbul edib. Səhər avtobusa minərək Tovuza yollanıb. Orda polis deyib ki, bundan niyə spirt iyi gəlir? Həmin şəxs də ayaqüstə dura bilib, normal vəziyyət olub. Sadəcə, üstündən spirt iyi gəlib. Bu səbəbdən də deyiblər ki, həmin şəxsi tribunaya buraxmayacağıq. Qalan azarkeşlərimiz isə buna etiraz edib. Ümumiyyətlə, bizim azarkeşlər 1 saat öncədən arenaya getsə də, fərqli bəhanələrlə tribunaya buraxılmayıb. Sonradan içki məsələsini qabardıblar. Bu səbəbdən də azarkeşlərimiz etiraz edərək stadiondan ayrılıb”.
Gördüyünüz kimi, sadə səbəbdən “Neftçi”nin azarkeşləri stadiona girməkdən imtina edib. Belə xırda söhbətlərə görə fanatları futboldan küsdürmək olmaz. Onsuz da uzun müddət idi Azərbaycan futbolunda azarkeş problemi yaşayırdıq. Oyunlara 150-200 nəfər gəlirdi. İndi rəqabətli çempionatda fanatların tribunaları doldurması müsbət haldı. Lakin belə mənasız söhbətlərlə ölkə futboluna böyük zərbə vururuq. Ümid edirik ki, hər iki tərəf səhvini anlayar və barışar. Həm “Neftçi”, həm də “Turan Tovuz” azarkeşi ölkə futbolu üçün önəmli qüvvədi.
İLKİN SULTANLI
Digər xəbərlər
