MHL-də aprelin 3-nə kimi keçirilən oyunlarla bağlı statistik məqamların sayı çoxdu. “Aylenders”i 5:0 hesabıyla məğlub edən “Tampa-Bey” pley-offa vəsiqəni təmin etdi və həmin mərhələdə “Toronto” ilə qarşılaşacaq.

"Football-plus.az" xəbər verir ki, “Edmonton”un “Anahaym” üzərindəki qələbəsinə (6:0) Konnor Makdevid qol və məhsuldar ötürmə ilə töhfə verdi. Cari mövsümdə 62-ci qolunu vuran kanadalı snayperlər cədvəlinin lideridi. 21-ci əsrdə yalnız “Vaşinqton”un kapitanı Aleksandr Oveçkin bir mövsümdə bundan artıq (2007/08 – 65 qol) vurub. Makdevidin rusiyalı ulduzun rekordunu yeniləmək üçün hələ 5 oyunu var.

Şənbə və bazar günləri ardıcıl iki qələbə qazanan “Boston” klub rekordlarını yenilədi. “Bryuinz” əvvəlcə “Pittsburq”u məğlub etməklə cari mövsümdə xal sayını 123-ə çatdırdı. Əvvəlki klub rekordu 1970/71 mövsümündə qeydə alınmışdı – 78 oyunda 121 xal. Bu mənada MHL rekordu isə 1976/77 mövsümündə keçirdiyi 80 oyunda 132 xal toplayan “Monreal”a məxsusdu.

Ertəsi “Sent-Luis”i də məğlub edən “Boston” cari mövsümdə qələbə sayını 60-a çatdırdı. Cim Montqomerinin komandası MHL tarixinə bir mövsümdə 60 qələbə qazanan 4-cü komanda kimi düşdü. Buna qədər “Monreal” (1976/77, 60 qələbə), “Detroyt” (1995/96, 62 qələbə) və “Tampa-Bey” (2018/19, 62 qələbə) 60 qələbə həddinə çatmışdı.