“Minnesota”nın rusiyalı hücumçusu Kirill Kaprizov “Sietl” ilə oyunda qol və 3 məhsuldar ötürmə sayəsində cari mövsümdə xal hesabını 101-ə (45+60) çatdırdı.

O, MHL tarixinə mövsüm ərzində ən azı 100 xal toplayan 7-ci rusiyalı kimi düşdü. Əvvəllər bunu Nikita Kuçerov (2018/19, 2017/18), Aleksandr Mogilnı (1992/93, 1995/96), Sergey Fyodorov (1993/94, 1995/96), Yevgeni Malkin (2007/08, 2008/09, 2011/12), Aleksandr Oveçkin (2005/06, 2007/08, 2008/09, 2009/10) və Pavel Bure (1992/93, 1993/94) bacarmışdı. Kaprizov həmçinin “Minnesota” tarixinin 100 xal toplayan ilk hokkeyçisidi.

Ümumiyyətlə, cari mövsümdə 100 xal həddinə çatan hokkeyçilərin sayı çoxdu. Kaprizov bu mənada 7-ci oldu və MHL-in 2006/07 mövsümündə müəyyənləşən rekord təkrarlandı. Onda da 7 hokkeyçi 100 xal toplaya bilmişdi.

Hazırda MHL-in simasını müəyyənləşdirən hokkeyçilərdən biri də Sidni Krosbidi. “Pittsburq”un hücumçusu “Detroyt”la oyunda fərqlənməklə karyerasında 10-cu dəfə 30 qol həddinə çatdı. Bu isə klub tarixində 2-ci nəticədi. Rekord Mario Lemyeyə (11 dəfə) məxsusdu, Krosbi isə bu göstəricidə Yaromir Yaqrın nəticəsini təkrarladı. Hazırda hesabında 516 qol olan kanadalı hücumçu MHL tarixində 39-cu yerdədi.

“Edmonton”un hücumçusu Konnor Makdevid “Kolambus” üzərində qələbəyə iki ötürmə ilə töhfə verdi. Forvard 1-dən artıq xal topladığı oyunların sayını 44-ə çatdırdı. MHL-də belə nəticəyə sonuncu dəfə Yaromir Yaqr nail olmuşdu. “Pittsburq”un şərəfini qoruyan çexiyalı 1995/96 mövsümündə 45 oyunda 1-dən artıq xal toplamışdı. Makdevid cari mövsümdə 78 oyuna çıxıb, 43 qol vurub, 75 məshuldar ötürmə verib və bombardirlər siyahısında liderdi.

Son günlər qeydə alınan bəzi komanda uğurları da var. “Florida” “Toronto”nu məğlub etməklə ardıcıl qələbələrinin sayını 13-ə çatdırdı və klub rekordu müəyyənləşdidi. 120 xalla Şərq konfransında liderliyi təmin edən “Panterz” sonuncu dəfə martın 28-də elə “Toronto”ya uduzub (2:5). Dünən səfərdə “Aylenders”i məğlub edən “Karolina” xalını 112-yə çatdırmaqla həm xal, həm də qələbə sayında klub rekordunu təkrarladı. Əvvəlki rekord 2005/06 mövsümündə qeydə alınıb ki, komanda həmin vaxt tarixində ilk və sonuncu dəfə Stenli kubokunu qazanıb.