MHL-də müntəzəm çempionat sona yaxınlaşmaqdadı. Ötən iki gündə keçirilən oyunlarla bağlı da bəzi maraqlı məqamlar var.

“Reyncers”in hücumçusu Kris Krayder “Karolina” ilə oyunda (2:5) fərqlənməklə 2021/22 mövsümündə 50 qol həddinə çatan 3-cü hokkeyçi oldu. Ona qədər “Toronto”dan Oston Mettyus və “Edmonton”dan Leon Drayzaytl da 50 qol vurmuşdu. 21-ci əsrdə MHL-də cəmi beş dəfə ikidən artıq hokkeyçi 50 həddinə çatıb. 2000/01, 2007/08, 2009/10 və 2021/22 mövsümlərində 3, 2005/06 mövsümündə isə 5 hokkeyçi bu nəticə ilə yadda qalıb.

“Los-Anceles”i 9:3 hesabıyla məğlub edən “Kolorado” mövsüm ərzində qələbə sayına görə klub rekordunu yenilədi. 2000/01 mövsümündə qeydə alınan əvvəlki rekord 52-yə bərabər idisə, cari mövsümdə komandanın hesabında artıq 53 qələbə var. 73 oyundan sonra 112 xal toplayan “Kolorado” Qərb konfransının lideridi.

Dünən daha iki komanda pley-offa vəsiqəni təmin etdi. “Pittsburq” buna “Aylenders”i məğlub etməklə (6:3) nail oldu. “Pinqvinlər” 76 oyundan sonra 97 xal toplamaqla Mərkəz divizionunda 3-cü yerdə qərarlaşıb. “Tampa-Bey” isə “Anahaym” üzərində qələbədən (4:3) sonra hədəfinə çatdı. Xatırladaq ki, məhz bu komanda son iki mövsümdə Stenli kubokunu qazanıb. “Laytninq” son 9 mövsümdə 8-ci dəfə pley-offda oynayacaq.

MHL-in əfsanələrindən biri – “Pittsburq”un hücumçusu Sidni Krosbi “Aylenders”lə dünənki oyunda qol və iki məhsuldar ötürmə ilə bu liqada xal sayına görə “Vaşinqton”un rusiyalı forvardı Aleksandr Oveçkinə çatdı. Hər iki ulduz 1405 xalla bu göstəricidə 21-ci yeri bölüşür. 36 yaşlı Oveçkin 1269 oyunda 776 qol vurub və 629 məhsuldar ötürmə verib. 34 yaşlı Krosbinin hesabında isə 1102 oyun, 515 qol və 890 ötürmə var. MHL-də xal sayına görə 20-ci yerdə qərarlaşan Deyl Haverçuk 1409 (518+891) xal toplayıb. Oveçkin cari mövsümdə keçirdiyi 72 oyunda 85 (46+39) xalla yadda qalıbsa, Krosbi 63 oyunda 80 (29+51) xal toplayıb.