“Edmonton”un forvardı Konnor Makdevid müntəzəm çempionatın “Çikaqo” ilə oyununda da fərqləndi.

Komandasının 3-cü qolunu vuran 25 yaşlı kanadalı hesabı 3:1 etdi. Beləliklə, Makdevid cari mövsümdə 40 xal həddinə hamıdan tez çatdı. O, cari mövsümdə keçirdiyi 23 oyunda 18 qol vurub və 22 məhsuldar ötürmə verib.

“Reyncers” srağagün səfərdə “Ottava”nı 3:1 hesabıyla məğlub etdi. Nyu-York komandasının şərəfini qoruyan Yaroslav Qalak MHL tarixinə 7 müxtəlif komanda ilə qələbə qazanan 7-ci qapıçı kimi düşdü. Ona qədər Ron Taqnatt, Kertis Makkileyni, Şon Burk, Aleks Old, Çed Conson və Brayan Buşe eyni nəticəni göstərib. Qalak cari mövsümdə keçirdiyi 7 oyunun yalnız birində qələbə qazanıb və qapısında 20 qol görüb.

Dünən keçirilən oyunda “Filadelfiya” üzərindəki qələbəyə “Tampa-Bey”in kapitanı Stiven Stemkos məhsuldar ötürmə ilə töhfə verdi. 32 yaşlı kanadalı klub tarixinə 1000 xal (494+506) həddinə çatan ilk hokkeyçi kimi düşdü. Stemkos karyerası boyunca 945 oyun keçirib. O, MHK tarixində bir komandanın heyətində 1000 xal toplayan 48-ci oyunçudu.

Dünənki daha bir oyunla bağlı maraqlı statistik məqam var. Səfərdə “Vankuver”i 5:1 hesabıyla məğlub edən “Florida” ilk periodun sonunda 59 saniyə ərzində üç qol vurmaqla yeni klub rekordu müəyyənləşdirdi. “Panterz”in əvvəlki rekordu 62 saniyəyə bərabər idi.