Terim bu klubu satın alacaq?
2021-in dekabrında ''Qalatasaray''dan ayrıldıqdan bu yana heç yerdə işləməyən və 15 aydı klubsuz olan Fatih Terim ilə bağlı növbəti şaiyə yayılıb.
Bir neçə gün öncə iddia edilmişdi ki, ''Trabzonspor''un yeni prezidenti Ərtuğrul Doğan Terimin böyük pərəstişkarıdı və klubun başına məhz onu gətirmək istəyir. Amma bu dəfə ''İmperator'' ilə bağlı tamam fərqli iddia ortaya atılıb.
"Football-plus.az" xəbər verir ki, Türkiyənin ən titullu məşqçisi artıq neçə müddətdi ailəsi ilə birlikdə ölkənin ən gözəl liman şəhərlərindən olan Bodrumdakı villasında yaşayır. Şaiyələrə inansaq, məhşur mütəxəssis 1-ci liqada mübarizə aparan ''Bodrumspor''u satın alaraq klubun sahibinə çevrilmək arzusundadı. İlk öncə TQRT kanalının ortaya atdığı bu iddia idman saytlarında ildırım sürəti ilə yayıldı. Amma ''Bodrumspor''un prezidenti Rza Karakaya bu məsələ ilə bağlı məlumatının olmadığını deyib:
''Bizə heç kimdən təklif gəlməyib. Biz də bu xəbərləri internetdən öyrəndik. Qarşıda bizi önəmli matçlar gözləyir. Belə şeylərdənsə, oyunumuza köklənməyə üstünlük veririk''.
''Bodrumspor''un superliqaya yüksəlmək şansı davam edir. 27 oyuna 42 xal toplayan komanda 7-ci pillədə, yəni pley-off zonasında qərarlaşıb. Komanda oyunlarını 5 minlik şəhər stadionunda keçirir. ''Bodrumspor''un indiki sahibi bir müddət öncə ''Antalyaspor''un prezidenti vəzifəsini icra edən Əli Şafak Öztürkdü.
Digər xəbərlər
