Türkiyənin köklü klublarından olan, amma tarixinin ən ağır dönəmlərini yaşayan “Altay” üçün xoş xəbərlər var.

"Football-plus.az" xəbər verir ki, tanınmış iş adamı Ahmet Nur Çəbinin İzmir təmsilçisini satın almaq planları gündən-günə ciddiləşir.

Çəbi Türkiyə futbol ictimaiyyətinə gözəl tanışdı. O 2019-23-cü illərdə “Beşiktaş”ın prezidenti vəzifəsini icra edib. İstanbul nəhəngi sonuncu çempionluğu məhz onun dönəmində qazanıb. Çəbi qısa müddət Klublar Birliyinin sədri kimi də çalışıb. Bir müddət öncə onun “Altay”ın sahibinə çevrilmək istəyi ilə bağlı iddialar ortaya atılmışdı. Daha sonra Çəbinin bu klubun prezidenti Sinan Kanlı ilə iki dəfə görüşdüyü məlum olmuşdu. Həmin görüşlərdən bir nəticə hasil olmamışdı. Çünki “Altay” 3-cü liqanı, yəni 4-cü divizionu tərk edərək həvəskarlar liqasına yuvarlanmaq təhlükəsi ilə üzləşmişdi.

Bu klub 2021-ci ildən bəri UEFA-nın transfer qadağası üzündən heyətinə yeni futbolçular cəlb edə bilmir! Borc bataqlığında üzən “Altay” bu mövsüm üstəlik 6 xallıq cəza alsa da, mübarizə apardığı 3-cü liqanın 4-cü qrupunu 12-ci pillədə tamamladı və həvəskarlar liqasına yuvarlanmaqdan qurtuldu. Türkiyə kubokunun ikiqat qalibi olan “Altay”ın iddialara görə 1 milyard lirədən çox borcu var! İndi izmirlilər Ahmet Nur Çəbinin verəcəyi maddi dəstəyə böyük ümid bəsləyirlər. Çəbi “Altay” liqada yerini qorusa, 3-cü dəfə görüşərik” sözünün üstündə duraraq klub rəhbərliyi ilə yenidən görüş keçirməyə hazırlaşır. Onun həftəsonu, daha dəqiq desək, iyunun 6-da İzmirə gələcəyi gözlənilir.

Maraqlıdı ki, fanatlar indidən onu təmtəraqlı şəkildə - pankartlar və gül-çiçək ilə qarşılamaq üçün hazırlıq görür. Ahmet Nur Çəbi ilə Sinan Kanlının görüşündə razılıq əldə olunsa, yeni seçkinin tarixi müəyyənləşdiriləcək və yeni idarə heyəti formalaşdırılacaq.