Türkiyədə dünya çempionatına hazırlıq həm yaşıl meydanda, həm də rəhbərlik səviyyəsində davam edir.

"Football-plus.az" xəbər verir ki, türkiyə Futbol Federasiyasının (TFF) bu aralar üzərində ən çox çalışdığı mövzu mundial üçün səyahətlərin planlaşdırılması və xüsusi dəvətli isimlərin müəyyənləşdirilməsidi.

Məsələ burasındadı ki, əvvəlki rəhbərliyin, yəni Mehmet Büyükekşinin prezidentliyi dönəmində TFF-nin yığmanın oyunları zamanı səyahətlərə geniş heyətlə yollanması və ən əsası bunun üçün külli miqdarda pulun ayrılması Türkiyə futbol ictimaiyyətində etiraza və böyük müzakirələrə səbəb olmuşdu. İbrahim Hacıosmanoğlunun rəhbərlik etdiyi indiki federasiya əvvəlki səhvlərə yol verməmək üçün bu mövzuda radikal addımlar atmaq qərarına gəlib. İlk yenilik ondan ibarətdi ki, artıq heç bir klub rəsmisinə və ya prezidentə pulsuz səyahət təşkil olunmayacaq!

Ötən nəhəng turnirdə klubların rəsmilərinin bilet, səyahət, otel pullarını federasiya ödəyirdi. Bu dəfə bununla bağlı hətta klublara məlumat xarakterli rəsmi məktub da göndərilib. Belə ki, mundialı canlı izləyərək okeanın o tayına yollanmaq istəyən klub prezidentləri üçün iştirak haqqı kimi 15 min dollarlıq məbləğ müəyyənləşdirilib. Yalnız bu məbləği federasiyanın hesabına köçürən başqanlar qurumla birlikdə səyahət edə və yığmanın oyunlarını izləyə biləcək. Turnirə həyat yoldaşı ilə birlikdə qatılmaq istəyən başqanlar isə daha çox – 24 min dollar ödəməli olacaqlar!

Bundan başqa biletlər VİP-lojadan yox, birinci dərəcəli tribunalardakı yerlərdən alınacaq. Pulsuz biletlərin hansı sistemlə paylanılacağına da aydınlıq gəlib. Futbolçularla məşqçilər korpusunun ailələrinə və yaxınlarına ümumilikdə 250 bilet veriləcək. Bənzər şəkildə Türkiyə yığmasının sponsor şirkətlərində çalışanlar üçün də 250 bilet nəzərdə tutulub. Federasiyanın idarə heyətinin hər bir üzvünə isə üç pulsuz bilet veriləcək.

Bu günə qədər nəhəng turnirlərə yalnız federasiyanın hesabına getməyə alışan klub rəsmilərinin bu yeniliyə reaksiyasının necə olacağı maraq doğurur. Hazırda Türkiyədə 139 klub prezidenti var. Qarşıdan isə federasiyanın illik maliyyə toplantısı gəlir. Bu yenilik üzündən toplantıda hərarətli anların yaşanacağı istisna olunmur. Üstəlik TFF rəhbərliyinin fəaliyyətinin qənaətbəxş olub-olmaması da səsverməyə çıxarılacaq...