Nəhayət ki, Türkiyə yığmasının da DÇ-2026 üçün yekun heyəti bəlli oldu.

Daha öncə baş məşqçi Vinçentso Montella tərəfindən 35 nəfərlik geniş heyət müəyyənləşdirilmişdi. Həmin heyətdən 9 futbolçunun adı çıxarılıb. Maraqlıdı ki, mundiala yollanan heyət sabiq ulduzların iştirakı ilə çəkilən video ilə ictimaiyyətə açıqlanıb. Həmin videoda Rüştü Rəçbər, Bülənt Korkmaz, Əmrə Belözoğlu, Hasan Şaş, İlhan Mansız kimi önəmli simalar yer alıb. Onlar əvvəlcə yığma komanda ilə bağlı arzularını səsləndirirlər. Sonra isə əllərindəki məktubu açaraq bir-bir heyətdə yer alan futbolçuların adlarını açıqlayırlar.

Beləliklə, Türkiyə yığması 24 ildən sonra ilk dəfə iştirak edəcəyi mundiala bu heyətlə yollanır:

qapıçılar - Uğurcan Çakır (Qalatasaray), Mərt Günok (Fənərbaxça), Altay Bayındır (Mançester Yunayted); müdafiəçilər - Əbdülkərim Bardakcı, Ərən Elmalı, Kaan Ayhan (hamısı ''Qalatasaray''), Çağlar Söyüncü, Mərt Müldür (hər ikisi ''Fənərbaxça''), Samet Akaydın (Çaykur Rizəspor), Merih Dəmiral (Əl-Əhli), Fərdi Kadıoğlu (Brayton), Ozan Kabak (Hoffenhaym), Zəki Çəlik (Roma); yarımmüdafiəçilər - Salih Özcan (klubsuz), İsmayıl Yüksək, Oğuz Aydın, İrfan Can Kahveci (hamısı ''Fənərbaxça''), Orkun Kökçü (Beşiktaş), Arda Gülər (Real), Hakan Çalhanoğlu (İnter), Can Uzun (Ayntraxt F); hücumçular - Barış Alpər Yılmaz, Yunus Akgün (hər ikisi ''Qalatasaray''), Kənan Yıldız (Yuventus), Kərəm Aktürkoğlu (Fənərbaxça), Dəniz Gül (Portu).

Adı geniş heyətdən çıxarılan isimlər bunlardı: Ərsin Destanoğlu, Ahmetcan Kaplan, Mustafa Eskihellaç, Yusuf Akçiçək, Atakan Karazor, Yusuf Sarı.

Qeyd edək ki, adı geniş siyahıda olan, amma yekun siyahıya düşməyən daha 3 futbolçu - Muhammed Şengezər, Aral Şimşir və Dəmir Ege Tıknaz yığmanın düşərgəsində ABŞ-yə yollanacaq. Təlimatlara əsasən FİFA komandaların ilk oyununa qədər zədə üzündən heyətdə 3 dəyişikliyə icazə verir. Türkiyənin heyətində də ilk oyuna qədər kimsə sıradan çıxsa məhz bu futbolçular komandaya daxil ediləcək.

Türkiyə bu gün Bakı vaxtı ilə saat 14.30 ABŞ-nin Flort Loderdeyl şəhərinə uçacaq və sabahdan etibarən hazırlıqlarını orda davam etdirəcək. ''Ay-ulduzlular'' mundial öncəsi son yoxlama matçını iyunun 7-də elə bu şəhərdə Venesuelaya qarşı keçirəcək.