Məşqçilik sahəsində hələ ki sözünü deməyən Burak Yılmazla bağlı yeni iddia ortaya atılıb.

"Football-plus.az" xəbər verir ki, daha öncə qısa müddət “Beşiktaş”da, eləcə də “Kayserispor” və “Kasımpaşa”da çalışan Yılmaz geridə qoyduğumuz mövsümdə “Qaziantep”in başında qəribə bir macəra yaşadı.

40 yaşlı mütəxəssis əvvəlcə dekabrın ortalarında fanatların etirazından təngə gələrək istefa verdi. Amma 4-5 gün sonra rəhbərlik onu geri dönməyə razı sala bildi. İkinci dəfə isə Yılmaz apreldə istefa verdi. O həmin vaxt bildirdi ki, artıq Türkiyədə yox, Avropada çalışmaq niyyətindədi. Ötənlərin məşhur futbolçusu bu arzusunu artıq bu yay reallaşdıra bilər.

“Fanatik” nəşrinin yazdığına inansaq, Burak Yılmaza Fransa çempionatından bəzi klublar maraq göstərir. Onların arasında “Lill”in də adı çəkilirdi. Amma bu iddia doğrulmadı. Çünki Bruno Jenezio ilə vidalaşan “şimallı itlər” dünən Karlo Ançelottinin oğlu Davide Ançelotti ilə anlaşdılar. Bununla belə, Yılmazın başqa bir Liqa-1 təmsilçisinin başına keçmək ehtimalı hələ də qalır. Hərçənd klub adı açıqlanmır. Burak Yılmaza Fransadan marağın olması təsadüfi deyil. Onun bu ölkədə böyük nüfuzu var. Çünki futbolçu kimi 2020/21-də “Lill”in qazandığı çempionluqda çox mühüm rol oynayıb. Yəni Fransadakı əlaqələri sayəsində onun bu ölkədə məqçi kimi çalışması sürpriz olmayacaq. Bu mövzuda qarşıdakı günlərdə yeni xəbərlərin olacağı gözlənilir.