Heç şübhəsiz, “Mançester Yunayted” azarkeşləri martın 5-ni uzun müddət, bəlkə də bir ömür boyunca unuda bilməyəcək.

Əlbəttə, söhbət “Liverpul”dan alınan acı, 0:7 hesablı məğlubiyyətdən gedir. David De Xea əlacsızcasına 7 dəfə topu tordan çıxarmalı oldu. Və bu qollardan ikisinin altında Məhəmməd Salahın imzası var idi. Təbii ki, misirli bu oyuna qədər “Liverpul”un heyətində premyer-liqada 127 qol vurduğunu, mümkün dublun onu klubun rekordçusuna çevirəcəyini bilirdi. Bu əlamərdar hadisə 83-cü dəqiqəyə təsadüf etdi. Özünün 2-ci, komandasının 6-cı qolunu vuran misirli rekordunu formasına çıxarmaqla qeyd etdi və buna görə sarı vərəqə də gördü.

Bəli, son iki qol Salahı “Liverpul”un premyer-liqadakı rekordçusu etdi. O, uzun illər ərzində Robbi Faulerin “özəlləşdirdiyi” zirvəyə oturdu.

Klub tarixinin bombardirləri
1. Məhəmməd Salah 129
2. Robbi Fauler 128
3. Stiven Cerrard 120
4. Maykl Ouen 118
5. Sadio Mane 90

Xatırladaq ki, Məhəmməd “Liverpul”la 2017-nin iyununda müqavilə bağladı və 2017/18 mövsümündən mersisaydlıların şərəfini qorumağa başladı. Bu, misirli hücumçunun premyer-liqaya ikinci gəlişi idi. Hələ 2014-cü ilin yanvarında müqavilə bağladığı “Çelsi”də özünü göstərə bilməmiş (13 oyunda 2 qol), ardından əvvəlcə “Fiorentina”ya, sonra da “Roma”ya icarəyə verilmişdi. A seriyasında keçirdiyi 2,5 mövsüm onu hər cəhətdən möhkəmləndirdi. Misirlinin məhsuldarlığı da artdı. A seriyasında vurduğu 35 qol artıq daha çətin sınaqlara hazır olmasına işarə idi. “Liverpul” forması geyən kimi aparıcı oyunçulardan birinə çevrildi. Debüt mövsümündə çempionatda 32 qol vurdusa, sonrakı illərdə də 19 qol həddindən aşağı düşmədi.
* 2017/18 mövsümü – 32 qol;
* 2018/19 mövsümü – 22 qol;
* 2019/20 mövsümü – 19 qol;
* 2020/21 mövsümü – 22 qol;
* 2021/22 mövsümü – 23 qol;
* 2022/23 mövsümü – indiyə qədər 11 qol.

Bu müddətdə premyer-liqada mübarizə aparan əksər klublar Məhəmmədin ustalığını öz üzərində hiss edib. Onun qapısına yol tapdığı rəqiblərin sayı 26-ya bərabərdi. Amma 4 komanda var ki, Salah bunları daha çox məyus edib.

* “Mançester Yunayted” – 11 oyunda 10 qol, hər oyunda orta hesabla 0,91 qol;
* “Uotford” – 8 oyunda 9 qol, hər oyunda orta hesabla 1,13 qol;
* “Vest Hem” – 11 oyunda 9 qol, hər oyunda orta hesabla 0,82 qol;
* “Bornmut” – 7 oyunda 8 qol, hər oyunda orta hesabla 1,14 qol.

Ümumi ortalamaya gəlincə, Salah “Lids”lə oyunlarda özünü daha yaxşı göstərib. O, yorkşirlilərə qarşı keçirdiyi 5 oyunda 7 top vurub ki, bu da hər oyunda orta hesabla 1,4 qol deməkdi.
Salah 129 qoldan 74-nü ev, 55-ni səfər oyunlarında vurub.

Bədənin hissələri
* Sağ ayaq – 20 qol
* Sol ayaq – 102 qol
* Baş – 7 qol
Meydanın hissələri
* Cərimə meydançası daxilindən – 121 qol
* Cərimə meydançası xaricindən - 8 qol
Standart vəziyyətlər
* Penalti – 18 qol
* Cərimə zərbəsindən birbaşa qol – olmayıb
Qolların zaman kəsiyi
* 1-15-ci dəqiqələr – 14 qol
* 16-30-cu dəqiqələr – 19 qol
* 31-45+ dəqiqələr – 24 qol
* 46-60-cı dəqiqələr – 20 qol
* 61-75-ci dəqiqələr – 23 qol
* 76-90+ dəqiqələr – 29 qol

Səbəbkardan sitat
Yalan deməyəcəm, bu nəsə xüsusi hadisədi. Burda çıxış etməyə başlayandan bəri rekord ağlımda idi. “Liverpul”da keçirdiyim ilk mövsümdən onun arxasınca düşmüşdüm. Faulerin rekordunu “Yunayted”ə qarşı oyunda qırmaq qeyri-adi hadisədi. İndi evə yollanacam, ailəmlə rekordu qeyd edəcəm, çobanyastığı çayını içəcəm və yatacam.