Mövsümboyu 1-ci liqada çempionluq iddiasını gizlətməyən “Baku Sportinq”də işlər heç də gözlənilən kimi olmadı. Bu komanda mövsümü 4-cü yerdə bitirdi. Güclü rəqiblər üzərində qələbə qazanan buzovnalılar autsayder “Difai” ilə heç-heçə etməsəydi, 9-cu yerdə qərarlaşan “Şimal”a məğlub olmasaydı, bəlkə də pley-offa qədər irəliləyəcəkdi. “Football-plus.az”a çatan məlumata görə, hədəflərinə çata bilməyən “Baku Sportinq” rəhbərliyi gələn mövsüm üçün büdcəni azaldıb. Bu isə klubda ayrılıqların yaşanmasına səbəb olub. Paytaxt təmsilçisi qarşılıqlı razılıq əsasında baş məşqçi Röyal Nəcəfov ilə yolları ayırıb. Bununla bağlı mütəxəssislə əlaqə saxladıq: “Klub gələn mövsüm üçün yeni təklif göndərmişdi. Məqsədlərimiz, hədəflərimiz, fikirlərimiz üst-üstə düşmədi. Bu səbəbdən mən yollarımızı ayırmağa qərar verdim. Fikir ayrılığı yaşadığımız üçün yollarımızı ayırdıq. Həm 1-ci, həm də 2-ci liqadan görüşüb-danışdığımız bir neçə klub var. Doğru seçimin hansı olduğunu zaman göstərəcək. Əsas məsələ hədəf və fikirlərimizin üst-üstə düşəcəyi komanda olmasıdı. Fəaliyyətimizə uyğun komanda olsa, inşallah, işləməyə davam edərik. Digər təkliflərə də açığıq”.
İSRAYIL XEYRULLAYEV