''Fənərbaxça''da prezident seçkiləri yaxınlaşdıqca namizədlər belə desək, coşur.

Həm Əziz Yıldırım, həm də Hakan Safi İstanbul nəhənginə çox mühüm isimlər transfer etmək niyyətindədi. Bu futbolçular arasında ən diqqətçəkəni Robert Levandovskidi. ''Barselona''dan rəsmən ayrılan ünlü polşalı forvardın karyerasını Türkiyədə davam etdirmək ehtimalı yaranıb. Safi özü tanınmış futbolçuya təklif irəli sürdüyünü etiraf edib.

Bu arada Levandovskinin həyat yoldaşı da fanatları həyacanlandırıb. Vətənində populyarlığına görə heç də Robertdən geri qalmayan, fitness müəllimi kimi çalışan və ''instaqram''da 5,7 milyon təqibçisi olan Anna Levandovska sosial şəbəkədə bir təqibçisinə verdiyi cavabla diqqət çəkib. O, ''Anna xanım, Türkiyəyə gəlmək ehtimalınız varmı'' sualına ''Türkiyə olacaq'' cavabını verib.

Türkiyə mətbuatında hətta 37 yaşlı oyunçuya edilən təklifin detalları da açıqlanıb. İddialara inansaq, Hakan Safi Levandovskiyə illik 10 milyon avro maaş olmaqla ikiillik müqavilə təklif edib. Önəmli karyeraya malik olan və xüsusilə ''Bavariya''da oynadığı illərdə dünyanın ən yaxşı mərkəz hücumçularından biri kimi göstərilən Levandovski geridə qoyduğumuz mövsümdə Kataloniya nəhəngində 46 rəsmi oyuna çıxaraq 19 qol, 4 məhsuldar ötürməlik performans sərgiləyib.

Amma onun Türkiyəyə gələ bilməsi üçün ilk növbədə Hakan Safi həftəsonu baş tutacaq seçkilərdə qalib gəlməlidi.