Voleybol üzrə yüksək liqaların 2022/23 mövsümünün reqlamenti dəyişdirilib.
Qurumun klub nümayəndələri ilə görüşündə çempionatların əsasnaməsinə əlavə və dəyişikliklər olunduğu bildirilib. Klubların da razılığına əsasən çempionat nəzərdə tutulduğu kimi 6 yox, 4 dövrədən ibarət olacaq və qalib pley-off mərhələsində müəyyənləşəcək.
Voleybol Mərkəzində təşkil olunan görüşdə çıxış edən qurumun vitse-prezidenti Əbülfəz Hüseynov dəyişikliyin səbəbini belə izah edib: “Azərbaycanda 2023 “Heydər Əliyev ili” olduğundan, federasiya ilin tədbirlər planına bəzi əlavə və dəyişikliklər edib. Mart, aprel və mayda müstəqil Azərbaycan dövlətinin qurucusu, görkəmli siyasi və dövlət xadimi, ümummilli Lider Heydər Əliyevin anadan olmasının 100 illiyinə həsr olunan yarışlar keçirəcəyik. Bütün bunları nəzərə alaraq, yüksək liqanın əsasnaməsinə bəzi əlavələr edilib. Belə ki, həm kişi, həm də qadın voleybolçular arasında keçirilən yüksək liqada komandalar 4 dövrədən ibarət olmaqla mübarizə aparacaq və qalib pley-offda müəyyənləşəcək. Dörd dövrənin nəticəsinə görə turnir cədvəlində birinci olan komanda dördüncü yerin sahibi ilə, ikinci olan isə üçüncü ilə üz-üzə gələcək. Yarımfinal mərhələsi iki, final isə üç qələbəyə kimi oynanılacaq”.
Federasiyanın baş katibi Fərid Xəlilov qeyd edib ki, əsasnaməyə edilən dəyişikliklər ölkə çempionatının gərginliyini və marağını daha da artıracaq. Onun sözlərinə görə, qarşıda klubları maraqlı turnirlər gözləyir. Həmin yarışlarda iştirak edəcək komandaların sayı yüksək liqa ilə müqayisədə çox olacaq. Xəlilov vurğulayıb ki, bu yarışlarda 1-ci liqa komandalarının da iştirakı planlaşdırılır.
Yeri gəlmişkən, kişi voleybolçular arasında yüksək liqanın yanvarın 12-də keçirilməli olan “Neftçi” - “Xarı bülbül” görüşü birincilərin oyunçularının xəstələnməsi səbəbindən qeyri-müəyyən müddətə təxirə salınıb. “Neftçi” rəhbərliyi bununla bağlı müraciət edib. Klubun müraciətində bildirilib ki, əksər oyunçular hazırda ölkədə geniş yayılan qrip virusundan və yüksək hərarətdən əziyyət çəkir və məşqlərdə iştirak edə bilmir. Bu səbəbdən federasiya qarşılaşmanın başqa vaxta keçirilməsini qərara alıb. Bu yerdə xatırladaq ki, qadın voleybolçular arasında yanvarın 11-də keçirilməli olan yüksək liqanın 2-ci turunun “Murov” - UNEC matçı da eyni səbəbdən təxirə salınıb. Beləliklə, iki gün öncə yalnız MOİK – “Murov” oyunu baş tutub. İlk turda “Neftçi” üzərində 3:1 hesablı qələbə qazanan “Murov” “həbrçilər”ə də şans tanımayıb - 3:0 (25:15, 25:11, 25:17). Dünən isə qadınlar arasında yüksək liqada yeni ilin ilk matçı baş tutub. “Azərreyl” çətinlik çəkmədən “Abşeron"u məğlub edib - 3:0 (25:18, 25:18, 25:21).
Bütün bunlar rəsmi hissə idi. İndi isə “bədii” hissəyə keçid alaq. Voleybol Federasiyasının 1 turdan sonra əsasnamədə dəyişikliyə getməsi, yəqin ki, analoqu olmayan hadisədi. Bu addımın peşəkarlıqla yaxından-uzaqdan əlaqəsi yoxdu, ola da bilməz. Adama sual sevərlər ki, 2023-ün Heydər Əliyev ili olduğu indi yadınıza düşdü? Axı Prezident İlham Əliyev bununla bağlı ötən il noyabrın 28-də sərəncam imzalayıb. Mövsümə isə dekabrın 15-də start verilib. Yəni bu müddət ərzində əsasnamədə dəyişiklik ertmək olmazdı? Burdan belə qənaətə gəlmək olar ki, sadəcə, diqqətsizliyə yol verilib. İndi isə əl-ayağa düşərək səhvlərini düzəltməyə çalışıblar. Amma necə deyərlər, qaş düzəltdikləri yerdə göz çıxarıblar...
Ümumiyyətlə, böyük təəssüf hissi ilə qeyd edək ki, son illərdə voleybol çempionatları, sadəcə, görüntü xatirinə təşkil olunur. Mövsümün gedişində dəyişikliklər edilməsi turnirin ayaqlar altında olan nüfuzunu daha da aşağı salır. Komanda sayının azlığı da bir dərddi. Düzdü, buna görə federasiya rəhbərliyini qınamaq fikrində deyilik. Onsuz da son illər voleybola yaxın duran, klubları maliyyələşdirən şirkətlər, sponsorlar qeybə çəkilib. Bu üzdən yükün böyük hissəsi məhz federasiyanın üzərinə düşür. Təşkilatçılığa görə isə məhz qurum cavabdehdi və bu işə həvəskar yanaşma qəbulolunmazdı. Sadəcə, ayıbdı, cənablar, ayıbdı...
KƏNAN HƏSƏNOV