Futbol ailəsindəsənsə, günün maraqlı keçir. Nəticələrə görə sevinməsək də, qalmaqallar başımızı qatır. Hələ bölgə komandaları premyer-liqada çıxış edəndə futbolumuz daha maraqlı olur.

Hazırkı dönəmin problemli mövzusu Əfran İsmayılovla Tərlan Əhmədov arasında yaşananlardı. Tərəflərdən biri susur, digəri danışır. Millimizin sabiq üzvü bütün saytlara, qəzetlərə, hətta telekanallara açıqlama verdi ki, baş məşqçi Gəncə klubuna layiq hərəkətlər etmir. Futbolçulardan pul yığır, onu edir, bunu edir...

Məsələnin bu tərəfinə qarışmıram. Əfran təcrübəli futbolçu və yetkin insandı. Əlində sübutları olmasa, belə fikirləri televiziya vasitəsi ilə səsləndirməz. Şəxsən mənim üçün onların futbolçu və məşqçi münasibətləri maraqlıdı. Gəlin, bunu düşünək: Əfran oyunçu kimi “Kəpəz”ə xeyir vermək potensialındadı? Əvvəlki vaxtlar olsaydı, bu haqda heç düşünməyə dəyməzdi. İndi isə suala cavab vermək çox çətindi.

Mövsümün əvvəllərinə qayıdaq. Yaşar Vahabzadə komanda formalaşdırmağa çalışırdı. “Səbail”dən ayrılan Rauf Əliyevi komandaya dəvət etdi. Hücumçu da dostunu Gəncəyə çağırdı. Əfran isə karyerasını bitirmək fikrində idi. Çünki Elxan Məmmədov onu məşqçi kurslarına qoşulmağa dəvət etmişdi. Lakin Raufun israrı Əfranı Gəncəyə getməyə məcbur edir. Niyə də getməsini? 10-15 dəqiqə oynayıb, maaşını alacaqdı. İlin sonunda karyerasını bitirəcəkdi. Sonra “Kəpəz” ardıcıl oyunlarda uduzdu. Raufla Əfran komandaya fayda verə bilmədi. Yaşar Vahabzadə komandanı tərk etdi və Tərlan Əhmədov gəldi. Elə ilk məşqdəcə mütəxəssis Raufu “qaraladı” ki, sən Şuaybuya söz deyə bilməzsən. Ondan sonra hücumçu əvəzedicilərdən ibarət komandaya göndərildi. Əslində problemin bu olduğuna heç inanmıram. Yəqin ki, Tərlan Əhmədovla Rauf Əliyev aralarında olan köhnə ədavəti Gəncədə həll etməyə çalışıblar.

Mənə bir məqam maraqlıdı: Əfran həmin dövrdə heç nə demədi. Bu necə olur? Axı siz dost idiz? Nəyi gözləyirdin, Əfran? Niyə onda mediaya açıqlama vermirdin ki, Tərlan Əhmədov gələn kimi haqsızlığa başladı, “Keşlə”də olanda da belə-belə işlər görürdü?

Bu məsələ haqda yazmaq istəmirdim. Amma gündəmdən düşmür deyə məcbur qaldım. Hansı saytı açırsan, “Əfrandan şok faktlar, dəhşətli sözlər” sərlövhəsi gözümüzü mazol edir. Belə şeylər futbolumuza zərrəcə xeyir vermir. Şəxsən mənə maraqlı deyil. Düşünürəm ki, siravi gəncəli də bu fikirdədi. Onlar bilir ki, Yaşar Vahabzadənin dönəmində “Kəpəz” normal futbol sərgiləmirdi. Tərlan Əhmədov gələndən sonra isə kollektiv toparlanıb, kubokda da yarımfinalın biraddımlığından döndü. Bəlkə də bu söz-söhbətlər komandanı motivasiyadan saldı. Bunları düşünürsüz?

Yenə qeyd edirəm, Əfran, sən onsuz da karyeranı bitirirdin. Raufa inanıb nə üçün Gəncəyə gəlirdin? Öz səhvinin acığını gənclərdən və gəncəlilərdən çıxırsan ? Ayıbdı, vallah! Açıqlamalarının birində dedin ki, Tərlan Əhmədov gənclərdən 20-30 manat pul yığır. Məndən istəyə bilmirdi. İndi bilmirəm, məşqçi sənə hörmət edirdi, yoxsa qorxurdu. Amma sənə dəyməyib ki? Özün mediaya məlumat verməsəydin, sakit tərzdə qış fasiləsində yolları ayıra bilərdin. Vallah, belə şeylər səni də gözdən salır. Sən Əfran İsmayılovsan! Vaxtilə uşaqlar üçün kumir idin. Səni Prezident tərifləyib. Yaxşı oynadığını deyib. Belə ucuz qalmaqallarla özünü dəyərdən salma!

Deyirsən ki, klubda işləmək istəyirsən. Belə primitiv şeylərə görə problem yaradan adama kimdi iş verən? Mənim belə iddiam yoxdu. Amma çoxları Tərlan Əhmədovun xasiyyətində problemlərin olduğunu deyir. Yəni futbolçularla yola getmir. Sən təcrübəli futbolçu olaraq bunu bilirsən axı. Ona görə davranmalı, xətir-hörmət saxlamalısan. Axı sən dünənki uşaq deyilsən, Əfransan!

İLKİN SULTANLI