Hər yerə can atan insanları sevirəm. “Bir adam iki-üç iş görə bilər” düşüncəsindəyəm.

Müasir dövrdə unikal olmalısan. Hər yerə əl atmalısan. Cavid Cəlilov da belələrindəndi. Adam unikaldı. Əslində adı çəkilən şəxs AFFA Hakimlər Komitəsində departament rəhbəridi. Həm də qurum tərəfindən 2022/23 mövsümü üçün tərtib olunan siyahıda 1-ci kateqoriyalı hakimdi. Nə isə, sözüm bunda deyil.

Adam hər yerə qaçır. Klublar üçün seminar olur, orda iştirak edir. Premyer-liqa və 1-ci divizion, hətta kubok oyunlarına təyinat alır. 33 yaşlı referi bu həftə üç matça təyinat alıb. Dekabrın 14-də premyer-liqanın 17-ci turunun “Kəpəz” - “Sabah” (2:2) matçında 4-cü hakim funksiyasını yerinə yetirirdi. Dekabrın 15-də “Turan Tovuz” - “Neftçi” qarşılaşmasında VAR hakimi idi. Dekabrın 16-da 1-ci divizionun 15-ci turu çərçivəsində keçirilən “Qarabağ-2” - “Qəbələ-2” görüşündə isə əsas söz sahibi olub. Yəni 3 gündə 3 matçın yükü bir adamın çiyinlərinə qoyuldu, Gəncə - Tovuz – Binə marşrutu üzrə hərəkər etdi. Bunu özümüzdən demirik a! Bütün təyinatlar AFFA və PFL-in rəsmi saytındakı xəbərlərdə əksini tapıb.

Bir çoxları üçün burda qeyri-adi nəsə olmaya bilər. Amma 2021-ci ilin avqustunda AFFA peşəkar hakim statusunu tətbiq edib. Belə hakimlər və ya köməkçilər qeyd-şərtsiz komitə tərəfindən maaşla təmin olunub. Sadəcə, qiymət fərqi var. Əsas hakimlər 1000, köməkçilər 700 manat məvacib alır. Bir də hər təyinata görə qonorar da verilir. Burdakı məbləğ açıqlanmayıb. Tutaq ki, bir matça görə komitə hər hakimə minimum 200 manat verir. Yəni adam 3 günə 600 manat qazanıb. Xeyir işlərə xərcləsin, pulda gözümüz yoxdu. Amma bu məqam peşəkar hakim statusuna yaraşmadı axı. Bakıdan Gəncəyə 345 km məsafədi. Ordan Tovuza 75 km. Ordan Bakıya geri qayıtmaq isə 433 km (bu məlumatlar toponavi.com saytından götürülüb – İ.S.). Ümumilikdə 853 km edir. Oyunların da ağırlığını nəzərə alsaq, bu fiziki yüklənməyə kimsə dözməz. Amma pul şirin şeydi. Bəlkə də dözmək olar. Bəs görülən iş peşəkar səviyyədə olacaqmı? Təbii ki, yox. Bəlkə də ölkədə hakim çatışmazlığı var. Buna görə Cavid bəyi 1-ci divizionun “Qarabağ-2” - “Qəbələ-2” matçına təyin ediblər ki, eybi yox, gəlib çatar. Yəni yola verər. Amma belə olmaz axı. Sən özün keçirdiyin çempionata dəyər vermirsənsə, başqaları niyə hörmət etsin ki?!

Hər şey bir kənara, insan amili var ortada. Hakimləri o qədər tələm-tələsiyə salırlar ki, yol qəzaları baş verir. Elə təzəlikcə Mingəçevirdən qayıdan referilər və hakim-inspektor qəzaya düşmədi? Düzdü, həmin hadisədə onların günahları olmayıb. Amma niyə gecə qayıtmağa məcbur olublar ki, qəzaya da düşələr?

Şəxsən mənim Cavid Cəlilovla heç bir problemim yoxdu. Amma bu ya vəzifədən sui-istifadə etməkdi, ya da Barış Şimşəyin köməkçisinə jesti. Bunun başqa adı yoxdu. Unikal olmaq əla şeydi. Bacardığın təqdirdə bir çox işi görə bilərsən. Amma pula aldanıb özünü oda atmaq o qədər də yaxşı hal deyil...

İLKİN SULTANLI