Türkiyəyə qarşı yoldaşlıq oyununda öz komandalarını dəstəkləmək üçün Diyarbəkirə gələn şotlandiyalı fanatlar şəhərdən məmnun ayrılıblar.


Football-plus.az xəbər verir ki, onlar öz ənənələrinə uyğun geyimləri ilə şəhərin tarixi abidələrini və turistlər üçün olan məkanları ziyarət ediblər. Tarixi məkanlardan sayılan “Denqbej evi”ni ziyarət edən qonaqlar yerli mətbəxi də bəyəniblər. Onlar yerli əhali ilə çoxlu şəkillər də çəkdiriblər. Şotlandiyadan gələn fanatlardan biri olan Yelena Straçan bunları deyib: “Diyarbəkirdə hər şey mükəmməldi. İnsanlar çox qonaqpərvərdi. Bura tarixi abidlərlə doludu. Yeməkləri də çox dadlıdı. Düzdü, bir qədər uzaqda yerləşir və bura gəlib çıxmaq çətindi. Amma hamıya buranı ziyarət etməyi məsləhət görürəm. Oyunda məğlub olmaq bizi çox da üzmədi. Matçdan öncə də demişdim ki, güclü olan qalib gəlsin. Vaxtımızın çoxunu Diyarbəkiri kəşf etməyə sərf etdik. Bu şəhər həmişə qəlbimizdə qalacaq”.

Valeri Barns adlı fanat isə bunları deyib: “Çox dadlı yeməklər yedik. Yerli insanlar bizi gözəl qarşıladı. Getdiyimiz şəhərləri gəzməyi xoşlayırıq. Buranın polisləri də çox yaxşı işləyir. Fikrimcə, onlar da bizdən razı qaldılar. Məncə, Diyarbəkirə gələcəkdə daha çox oyun verilməlidi”.

Bu arada bu mövzuya uyğun olaraq bir maraqlı xəbəri də diqqətinizə çatdıraq. Şotlandiya təmsilçisi “Sent Conston” dünyada analoqu olmayan və tarixdə nadir görünən bir feyr-pley örnəyi nümayiş etdirib. 10 il öncə, daha dəqiq desək, 2012-ci ilin iyulunda “Sent Conston” “Əskişəhərspor”a rəqib olmuşdu. O vaxt bu komandalar Avropa Liqasının 2-ci təsnifat mərhələsində qarşılaşmışdı. Səfərdən 1:1-lik bərabərliklə dönən Türkiyə təmsilçisi evdəki 2:0-lıq qələbə ilə mərhələni adlayan tərəf olmuşdu. Həmin vaxt “Sent Conston” fanatları Əskişəhərin qonaqpərvərliyinə və gözəlliyinə heyran qalmışdılar. Bu iki klub o vaxtdan belə desək, qardaş klublar sayılırlar. Amma həmin vaxtdan bu yana bu iki kollektiv tam fərqli qrafik cızıb. “Sent Conston” son 10 ildə 2 dəfə ölkə kuboku və 1 dəfə ölkə superkuboku olmaqla 3 titul qazanıb. Sonuncu dəfə superliqada 2015/16-da çıxış edən “EsEs” isə uzun müddətdi ciddi maliyyə böhranı yaşayır. Komanda hazırda 3-cü liqa, yəni 4-cü divizionda çıxış edir və orda da düşmə zonasında qərarlaşıb. Ordan oyanası isə həvəskarlar liqasıdı! “Sent Conston” fanatları “qardaş komanda”ya dəstək olmaq qərarına gəliblər. Ötən həftəsonu daxili çempionatın 16-cı turu çəçivəsində “Motervell”ə qarşı baş tutan ev oyununda (1:1) bu baxımdan diqqətçəkən hadisələr yaşanıb. Fanatlar əvvəlcə 500 biletin pulunu Əskişəhərdə fəaliyyət göstərən uşaq fondlarından birinə göndərdilər. Matçdan öncə isə yardım kampaniyası keçirilib. Klubdan verilən rəsmi məlumatda qeyd olunub ki, bu kampaniya zamanı toplanılan 1961 funt sterlinq (təxminən 45 min lirə) həcmində pul “Əskişəhərspor”a göndərilib. Daha öncə oktyabrın sonlarında “Kilmarnok”a qarşı ev oyununda “Sent Conston” fanatları tribunada üzərində “Əskişəhərspor”u xilas edək” və “Anadolunun ulduzunu sönməyə qoymayaq” sözləri yazılmış bannerlər açmışdılar!