“Beşiktaş”da bir ayrılıq baş tutub.

Football-plus.az xəbər verir ki, amerikalı vinger Tayler Boyd klubla müqaviləsini birtərəfli şəkildə pozub. Özü də bunun üstü indi açılsa da, Boyd klubdan ayrıldığını Türkiyə Futbol Federasiyasına hələ noyabrın 4-də bildirib. Onun müqavilə müddəti gələn yay başa çatacaqdı. 2019-un yayında “Gimaraynş”dan 2,4 milyon avroya transfer edilən bu futbolçu İstanbul nəhəngində özünü heç cür göstərə bilmədi. 2020/21-in ikinci dövrəsini icarə əsasında “Sivasspor”da, ötən mövsümü isə “Çaykur Rizəspor”da keçirən 28 yaşlı futbolçu bu yay “Qartal”ın hazırlıq dönəmində iştirak etmişdi.

O hətta avqustun 22-də “Alanyaspor”la matçın (3:3) 2-ci hissəsində meydana da çıxmışdı. Amma sonradan Boydun adı legioner limiti üzündən mövsümlük iştirak ərizəsinə salınmadı. Məsələnin maddi tərəfinin necə həll olunacağı bilinmir. Tərəflər arasında anlaşma olmasa, məsələyə FİFA qarışacaq. Boyd adının iştirak ərizəsinə salınmaması ilə hüquqlarının pozulduğunu iddia edə bilər. Yəni futbolçu müqaviləni haqlı şəkildə pozduğunu sübut edə bilsə, “Beşiktaş” onun mövsümün sonuna qədər olan məvacibini ödəmək məcburiyyətində qalacaq. Maraqlıdı ki, 3 il öncə dəyəri 2,4 milyon avro olan Boydun indiki dəyəri cəmi 425 min avrodu. Onun qışda superliqanın başqa klubuna keçəcəyi istisna olunmur.