Yığmamız bu gün növbəti, daha dəqiqi, sonuncu yoldaşlıq oyununda qüvvəsini sınayacaq. Komanda Malta ilə qarşılaşdığı stadionda bu dəfə San Marino ilə üz-üzə gələcək. Düzdü, bu rəqib FİFA reytinqində Maltadan da aşağıda – 211-ci sırada qərarlaşıb. Yəni bizimkilərin bu “cırtdan”ı məğlub etməsi ehtimalı daha yüksəkdi. Ancaq ilk oyunda ümidlər elə qırıldı ki, indi qələbəyə tam inanmaq olmur! O başqa məsələ ki, söhbət millidən gedir və bu üzdən yığmamıza ikinci şansı verməkdən başqa çarəmiz yoxdu.

Xatırladaq ki, oyun “CBC Sport”un efirində canlı yayınlanacaq.

Yoldaşlıq oyunu
Azərbaycan – San Marino
Hakimlər: MARTON RUŞ, Balaş Şert, Balaş Şalai, Bençe Çsonka (hamısı Macarıstan).
Sombathey, “Haladaş” stadionu. Saat 22.00.

Öz aramızdı, San Marionun əksər futbolçuları legioner həyatı yaşayır. Zarafat deyil, söhbət 18 oyunçudan gedir. Düzdü, onlar adlı-sanlı klublarda çıxış etmir. Ancaq təkcə bu statistika komandanın inkişaf istəyini ortaya qoyan amillərdəndi. Bununla belə, millimizi çətın sınağın gözlədiyini iddia edə bilmərik. Hadisələrin axarında bir maneə ortaya çıxmasa, yığmamız Avstriya toplanışını uğurla başa vuracaq və Millətlər Liqasından əvvəl keçirmiş olduğu son oyunda psixoloji durumunu yaxşılaşdıracaq. Həmçinin Ayxan Abbasovun bu dəfə fərqli start heyətinə üstünlük verəcəyi gözlənilir. Axı bir çox təcrübəli oyunçu Maltaya qarşı oyunda forma geymədi.

Maraq üçün bildirək ki, milli komandaların qarşılaşmasında indiyə qədər San Marinoya uduzmamışıq. Bu rəqibi dünya çempionatının seçmə mərhələsində 2016-cı ildə 1:0, 2017-ci ildə 5:1 hesabıyla məğlub etmişik. U-19 yığmamız da San Marinodan olan həmyaşıdlarına zəfər sevinci yaşatmayıb. Belə ki, Avropa çempionatının seçmə mərhələsində keçirilən qarşılaşmalarda 2002-ci ildə 3:0, 2008-ci ildə 5:0, 2019-cu ildə isə 2:0 hesabları qeydə alınıb. İndi milli bu uğurlu seriyanı davam etdirməli, rəqibin Azərbaycan tilsimini qırmasına imkan verməməlidi.

KƏNAN BAHADIR