Bir neçə gün öncə ''Qalatasaray''ı ziyarət edən Kapone bu dəfə Fatih Terimi ziyarət edib.

Football-plus.az xəbər verir ki, bu anı sosial şəbəkədəki səhifəsində paylaşan sabiq braziliyalı futbolçu ''Ata ''İmperator''u ziyarət. Səninlə bir araya gəlmək hər zaman gözəldi'' ifadəsini yazıb. ''Qalatasaray''ın bir qədər stajlı fanatları yəqin ki, Kaponeni gözəl xatırlayır. Tam adı Karlos Alberto de Oliveyra olan 1972-ci il təvəllüdlü Kaponenin yolu Türkiyəyə 1999-da düşmüşdü.

''Qalatasaray''a gələnə qədər çox da populyar oyunçu sayılmasa da, İstanbul nəhəngində Fatih Terimin müdafiədə əsas oyunçularından birinə çevrilmişdi. 1999/00-də qazanılan UEFA kubokunda onun da kifayət qədər böyük rolu olmuşdu. O, 3 mövsüm ərzində 2 çempionluq, 1 UEFA kuboku və 1 Avropa superkuboku qazanaraq klubda iz buraxmağı bacarmışdı. ''Qalatasaray''da 67 oyuna çıxan və 4 qol vuran Kapone daha sonra Türkiyədə ''Kocaelispor''un da şərəfini qorumuşdu. Amma bu klubda cəmi 4 oyun keçirə bilmişdi.