Deyirlər ki, Əkizlər bürcündən olan adamlar fikrini tez-tez dəyişir.

Mən də bu bürcdənəm. Amma deyilənlərlə razı deyiləm. Bəli, hansısa bir situasiya ilə bağlı fərqli fikirlərim ola bilər. Amma məqsədlərim, arzularım, işim, karyeram, dini və siyasi düşüncəm həmişə eyni olub. Bunun dəyişəcəyinə də inanmıram. Uşaqlıqdan jurnalist olmaq istəyirdim. Azyaşlı olduğum vaxtlardan futbola marağım var idi. Sonradan ailəmin təzyiqi ilə “Xəzər Universiteti”ndə “İnşaat mühəndisliyi” ixtisası üzrə təhsil aldım. Amma çox keçmədi ki, öz arzularımın arxasınca qaçdım. İkinci kursda oxuyandan, yəni 2012-in əvvəlindən idman mediasında cızma-qara edirəm. Hər dəfə ailəmə bir söz deyirdim: “siz razı olmasaz da, mən idman jurnalisti olacam”. Şükürlər olsun ki, istəyimə çatdım. Özümü tərifləmək niyyətində deyiləm. Sadəcə, hər nə qədər çətinliklərlə üzləşsəm də, fikrimdən dönməməyin insan üçün xeyirli olduğunu gənc oxucuların diqqətinə çatdırmaq istəyirəm. Yaşlılar isə onsuz da bunu bilir.

Bu qədər girişi harasa bağlamaq lazımdı. Həyatımda başverənlərin bir qismini sizinlə bölüşməyimin səbəbkarı Mahir Emrelidi. Düşünməzdim ki, yığmamızın hücumçusu fikrini tez-tez dəyişən biridi. Amma son müsahibəsini oxuyandan sonra barmağımı dişlədim. “Dinamo”nun forvardı “Report”a karyerası və başına gələnlər haqda danışıb. Həqiqətən çox sevindim. Heç olmasa, başına gələnlərin səbəbini öyrənəcəkdim. Amma müsahibənin ilk sualının cavabından şoka düşdüm. Həmkarımız Elnur Salahov Mahirdən “ölkə xaricində çıxış edən nadir yerli futbolçulardansız. İnsanlar sizdən daha çoxunu gözləyir. Ona görə də ehtiyatda qalmağınız futbol ictimaiyyətini, azarkeşləri narahat edir. Onlara nə demək istərdiz? Mahir Emrelini yenidən nə vaxt əsas heyətdə görə biləcəyik?”, - deyə soruşur. Hücumçunun cavabına fikir verin: ”Mən də bu yola uğur qazanmaq üçün çıxmışam. Bunu hamıdan çox istəyirəm. Açığı, Azərbaycanda azarkeşlərin mənə görə narahatlıq keçirdiyini düşünmürəm (gülür). Narahat olanlar varsa, onlara təşəkkürümü bildirirəm”.

Nədi bu? Öz aləmində hamıdan ağıllı olduğunu göstərmək? Necə yəni mənim üçün narahat olan yoxdu? Bəs “Legiya”da azarkeşlərdən bir sillə yeyəndən sonra Azərbaycan kanallarının hamısını bir-bir gəzib azarkeşlərə problemlərinin izahını vermirdin? Onları inandırmağa çalışmırdın? İndi səni vecinə almayanlar onda niyə narahat olurdular? Ay qardaş, sən deyildin “Legiya”nın heyətində qol vurandan sonra elə bizə, başqa media orqanlarına açıqlama verən ki, xalqımızın, azarkeşlərin sevincini görmək məni xoşbəxt edir. İndi onlardan kimsə sənə görə narahat olmur? Zaqrebə keçəndən sonra fikrin dəyişdi?

İkinci maraqlı məqam budu ki, adam FİFA tərəfindən futboldan uzaqlaşdırılmasının və borcunu ödəməməsinin səbəbini açıqlamır: "Legiya" ilə söhbət "dəlinin biri quyuya daş atdı" məsəlinə oxşadı (gülür). Mənə aid bir məsələ deyildi. Heç bir qərarla tanış olmadım və fərqli hiss keçirmədim. Mənim üçün hər şey yolunda idi. Gördüyünüz kimi, heç bir oyunu buraxmadım. "Legiya"nın bir işçisinin şəxsi tviti idi, rəsmi deyildi”. Həmkarımız da cavabında deyir ki, a kişi, nə danışırsan? “Dinamo” məsələ ilə bağlı rəsmi məlumat yayıb. Bundan sonra Mahir ilişir və cavabı belə olur: “Bu barədə çox danışmaq, dərinə getmək istəmirəm”. Niyə? Çünki özünün və ətrafında olanların səhvini bilir. Onları pis vəziyyətdə qoymaq istəmir. Tutaq ki, Mahirin “Legiya” ilə əldə olunan razılaşmanın şərtlərindən xəbəri olmayıb. Bəs menecerləri hara baxıb? Bir dəlinin quyuya daş atması idisə, əvvəlki aylarda niyə ödəniş etmisən? Yalan danışmağa nə ehtiyac var? Açıq-aşkar deyə bilmirsən ki, bu işdə mən yox, menecerlərim günahkardı? Hə! Menecerlərindən biri anan Elnurə xanımdı axı. Mən də olsam, valideynimi qəzəbdən qorumaq üçün belə edərəm. Amma daha belə yalan danışmaram.

Görünən odu ki, Mahir psixoloji sarsıntı içindədi. Bu da oynuna və səhhətinə təsir edir. Artıq 5-ci dəfədi koronavirusa yoluxur. Bu zibil də nə pis şey imiş. Mən 14-16 dəfə test verdim. Şükürlər olsun ki, hamısında neqativ çıxdı. Yaxşı ki, yoluxmamışam. Deyəsən, bu xəstəliyə tutulanlar sonradan fikrini tez-tez dəyişir, orda-burda yalan danışırlar. Elə haqqında danışdığım Mahir Emreli kimi...

İLKİN SULTANLI