Qəzetimizin ötən cümə axşamı sayınzda “Mahir Emreli serial kimi həyat yaşayır” sərlövhəli yazını diqqətinizə çatdırmışdım.

Bəyənənlər də oldu, bəyənməyənlər də. Sosial şəbəkələrdə fikirlərini aqressiv şəkildə bildirənlərlə təşəkkür edənlər arasında qaldım. Hətta məni qınayanlar belə oldu. Amma bir düşünün, azərbaycanlı jurnalistin futbolçu ilə nə dərdi ola bilər? Heç nə! Emreli “Qarabağ”ı tərk edəndən sonra haqqında onlarla yazı hazırlamışam. Özü, anası və atası ilə müsahibələr etmişəm. Menecerlərlə keçidi, müxtəlif vəkillərlə yaşadıqları haqda söhbətlər etmişəm. Bir azərbaycanlı olaraq, Mahirə faydam zərərimdən çoxdu. Təbii ki, bu mənim işimdi. Buna görə “Futbol+”dən qonorar almışam. Düşünürəm ki, bəzi məsələləri yerində və lazımi səviyyədə oxucuya çatdırmışam. Bu təkəbbür deyil, özümün işimə verdiyim dəyərdi.

Mətləb üstünə gəlirəm. Niyə yenə Mahir haqda? Cavab çox sadədi. Bazar günü Xorvatiya çempionatının 13-cü turunda “Dinamo” Zaqrebdə “Varazdin”lə qarşılaşıb. Görüş meydan sahiblərinin 3:1 hesablı qələbəsi ilə başa çatıb. Azərbaycanlı balası Mahir 90 dəqiqə ehtiyatda qalıb. Bu adam ölkənin son illərdə yetişdirdiyi ən yaxşı futbolçudu. Mədətov olanda da, Emreli olanda da onu Avropada görmək istəmişik. Tənqid etmişik, tərəfində durmuşuq. Səhvlərinin səbəbini özündən və Qurban Qurbanovdan soruşmuşuq. Amma özünün səhvlərini! “Legiya”ya gedəndən sonra Azərbaycan futbolu üç seqmentə bölündü: premyer-liqa klubları və avrokubok macəraları, milli komanda, ...Mahir Emreli xəbərləri! Gəlin etiraf edək ki, “Legiya”da parladığı dövrdə hamı onunla bağlı nəsə paylaşır, reytinq yığmaq istəyirdi. Sonra isə problemlər qabardıldı. Bundan da xal toplamaq istəyənlər oldu. “Futbol+” qəzeti, şəxsən mən belə halların baş verməsinə qarşıyıq. Biri haqda yazırıqsa, ulduz sayırıqsa, onun haqda məlumatları, doğru olan informasiyaları həmişə ictimaiyyətə çatdırmalıyıq. Nədi həqiqət? Görünün odu ki, Emreli Ante Çaçiçin “qara siyahısı”ndadı. Mən şəxsən inanmıram ki, “Legiya”da şou göstərən Mahir “Dinamo”nın heyətinə düşə bilməsin. Tutaq ki, ilk “11-lik”də oynamağa qadir deyil. Bəs sonradan niyə meydana çıxmır? Bir ay öncə milli Qazaxıstanla oynayanda meydana çıxandan sonra 3 qol vurmadıq? Mahir özünü yaxşı tərəfdən göstərmədi? Göstərdi! Bəs onun oynamamasının səbəbi nədi? Bunun cavabını tapmışam.

Ötən yazıda qeyd etmişdim ki, hansısa verilişdə Elnurə Emreli oğlunun “Dinamo”dakı durumunu dəyərləndirib. Bu məsələ ilə bağlı fakt əldə etmişəm. Təqdim etdiyim şəkildə Elnurə xanım, qardaşı Bəxtiyar bəy, Endo Osmani və Taqi T adlı şəxs sosial şəbəkələrin birində Mahirin durumu ilə bağlı müzakirələr edib, söhbətləşiblər. Bu da klub rəhbərliyinin və baş məşqçinin qulağına çatıb. Məhz bundan sonra Emreli Çaçinin “qara siyahı”sına düşüb.

Çox uzatmayacam. Yazıya başlayanda işlə bağlı fikirlərimi diqqətinizə çatdırdım. Bəli, hər kəs öz işi ilə məşğul olsa, yaxşı olardı. Təbii ki, oğlu ana qədər heç kim sevə bilməz. Amma ana da, sadəcə, analıq etsə, daha yaxşı olmaz? Nəyə lazımdı mediada açıqlamalar vermək, diqqəti üzərinə çəkmək? Bunlara da ok! Bəs menecerlik? Vallah, baş açmıram!

Bəlkə bu, Mahir Emrelinin ailəsi ilə bağlı son yazımdı. Amma mənə bir məqam maraqlıdı. Mahir Mədətov olan vaxtı da adı maqazin xəbərlərində hallanırdı. Məsələn, “Qalatasaray”a gedir”, “Sevilya” istəyir” tipli informasiyalar tirajlanırdı. Anar Mədətov hər dəfə eyni şeyi deyirdi: “Buna baş məşqçisi qərar verəcək. Ondan soruşun. Ən yaxşısını baş məşqçisi bilər”.

Məhz belə şeylərin sayəsində dağılan “Bakı”nın heyətindən “Qarabağ”a transfer olunan Mahir burda özünü göstərməyi bacardı. Təbii ki, hamı Anar Mədətovun danışıq, menecerlik qabiliyyətinə bələddi. O, niyə belə hoqqalara əl atmırdı? Bəlkə də Mədətovun Emreli olması insani-mənəvi cəhətdən sarsılmasına, futbolçu kimi karyerasının çöküşünə səbəb olub? Buna nəsə deyə bilmərəm. Bildiyim bir şey var ki, ata heç vaxt övladının pisliyini istəməz! Elə ana da!

Ümid yaxşı şeydi. Həmişə yaxşı hadisələrin baş verəcəyinə inanırsan. Bəzən ailə bütün ümidlərinin üstündən xətt çəkir. Elə Mahir Emrelinin həyatındakı kimi! İstedad var, bacarıq var! Sadəcə, ailədaxili məsələlər azərbaycanlı futbolçunun ümidlərini puç edir. Bunun əlacı Mahirin özündədi. “Dinamo”da oynamadığına görə pis olub Azərbaycana qayıtma, Mahir! Türklər demiş, kəndinə qayıt!

İLKİN SULTANLI