“Açığı, adlara baxanda qrupdan çıxmağın çətin olduğu görünürdü. Amma “Frayburq”la oyun göstərdi ki, bu qrupda kimin qalib gələcəyi bəlli deyil. Hər kəs bir-birini üstələmək iqtidarındadı. “Nant”la oyunda isə, belə deyək, əslində heyətə baxanda hiss olunurdu ki, “Qarabağ”ın hücumları təhlükəli olacaq. Ozobiçin ortada oynaması, Kadinin cinahda yer alması buna əsas verirdi. O cümlədən, sözsüz, müdafiə xəttində problemlər var idi. Buna baxmayaraq, ilk hissədə bəxtimiz də gətirdi. Rəqib yaratdığı imkanlardan yararlana bilmədi. Şahruddin də soyuqqanlı oyunla buna mane oldu. İkinci hissədə meydanın mərkəzini Qara və Yankoviçin sayəsində ələ keçirdik. Oyunun taleyini Zubirlə Kadi həll edə bilər. Amma işin çox hissəsini Qara və Yankoviç gördü. Rəqibi ortada “boğandan” sonra, top bizdə olanda Kadi, Zubir və Ovusu boşluqlardan istifadə edib qolları vurdu. Hesab edirəm ki, birinci qoldan sonra onlarda hər şey dağıldı. Daha sonra ikinci və üçüncü qol gəldi. Bu oyundan sonra qrup birinciliyi hədəfinin öhdəsindən nə dərəcədə gələ biləcəyimizi deyə bilmərəm. Amma ikinci yer mümkündü. Ən çətin oyunlarımız elə “Frayburq” və “Nant”la idi. Sonrakı görüşlər də bu səpkidə baş tutacaq. Düşünmürəm ki, rəqiblər “Qarabağ”ı bütün komponentlərdə üstələsin. Əlbəttə, məğlub olmaq da, qalib gəlmək də mümkündü. Bu hücum potensialı ilə qrupdan çıxacağımıza inanıram. Fikrimcə, bunu bacaracağıq”.

“Həyatmda ilk dəfə “Qarabağ”ı belə istəkli görürdüm. Düzdü, həmişə mübarizə aparırlar. Amma “Nant”la oyunda 1 nəfərin üstünə 3 nəfərlə pressinq edirdilər. Bu bir motivasiya idi. Bildiyiniz kimi, son günlər cəbhə bölgəsində başverənlər hamını sarsıtdığı kimi, onlardan da yan keçməmişdi. Bizim üzərimizdə olan məsuliyyətin bəlkə də 5 qatı onların üzərində idi. Çünki rəqib Fransa komandası idi. Bilirik ki, bu ölkə düşmənlərimizin arxasında duranlardan biridi. Bir kəlmə ilə onu deyə bilərəm ki, baş əyirəm bu komandanın qarşısında. Bundan sonra qrupdan çıxmaları, qalan oyunlar o qədər də önəm daşımır. Onlar ki bu çətin vəziyyətdə hamınınn başını uca tutdu, hamısının qarşısında baş əyirəm. Heç birini fərqləndirmək istəməzdim. Çünki hamısı meydanda mübarizə aparır, can qoyurdu. İnanıram ki, komanda bir neçə futbolçu ilə də güclənsə, bundan da gözəl oyunların şahidi olacağıq. Amma yenə də şükürlər olsun ki, “Qarabağ” Azərbaycanı Avropada, dünyada tanıdan klubdu. Bununla fəxr edirik. İnanıram ki, uğurun davamı gələcək. Uğur uğuru gətirər. Mən meydanda olan və olmayan bütün futbolçuları qəhrəman sayıram. Qrupdan çıxmaq şansları isə 2 oyundan sonra bəlli olacaq. 3 xalımız varkən bunu deyə bilmərik. Oyun üslubuna baxanda isə görünür ki, qrupda ən yaxşı komanda “Qarabağ”dı. Dominant futbol oynayan bizim komandadı. İstər səfər, istərsə də ev oyununda dominantlığını ortaya qoyur. Lider kimi deyə bilmərəm, çünki artıq “Frayburq”un 6 xalı var, amma qrupu 2-ci yerdə başa vura bilərik. Növbəti oyunda rəqib “Olimpiakos” olacaq. Bu da çətin görüşdü. Bu komanda 2 oyundu uduzur. Çox istəkli olacaqlar. “Olimpiakos” köklü, çılğın azarkeşləri olan komandadı. Əminəm ki, bu oyun da maraqlı alınacaq. “Frayburq” üzərində dominantlıq edən “Qarabağ” bunu “Olimpiakos”a qarşı niyə etməsin?! Əlbəttə, qələbə qazana bilərik. Sadəcə, son oyundakı istək, əzmkarlıq lazımdı. “Qarabağ” bu matçda mənə “Barselona”nı xatırlatdı. Necə ki, La Liqa komandası topu itirən kimi 3 saniyəyə qazanırdısa, eyniilə “Qarabağ” da həmin oyunu nümayiş etdirirdi”.