“Bu qarşılaşma son günlərdə düşmənlə sərhəddə baş verən döyüşlərin kölgəsində qalmışdı. Oyuna psixoloji cəhətdən hazırlaşmaq asan deyildi. Futbolçularımız da bunu xüsusi vurğulayıb. Futbol idman oyunu təşəkkürünü çoxdan aşıb, cəmiyyətə, ayrı-ayrı ölkələrə böyük təsir qüvvəsi var. Rəqib düşmənpərəst olanda mahiyyət, məsuliyyət dəfələrlə artır. Qarşılaşmanın gedişində hiss olunurdu. UEFA nümayəndələri, hakimlər briqadası görüşlə bağlı xüsusi təlimatlandırılmışdı. Eyni zamanda idarəçilik keyfiyyəti "Frayburq" - "Qarabağ" oyunundakı hakim özbaşınalığının da beynəlxalq qurumda daxili araşdırma aparıldığını göstərirdi. Yeri gəlmişkən, səfər matçında ağdamlıların penaltisinin verilməməsi epizodunun oxşarı bu oyunda baş verdi. Cərimə meydançasında yox, 4-cü hakimin qarşısında. Hər iki texniki zonaya yaxın olan Ozobiç çiyin-çiyinə mübarizədə rəqibi qoltuq nahiyəsindən itələdi. Xırda fol dərhal qeydə alındı. Psixoloji cəhətdən narahatlıq olsa da, referi üçün görüşü idarə etmək çox asan idi. Səhv, oyuna yersiz müdaxilə olmadı. Oyunətrafı gərginliklə bağlı futbolçularla xüsusi söhbətlərin aparıldığı açıq sezilirdi. Xırda mübahisə, yersiz hərəkət tribunaları ayağa qaldıra bilərdi. Xüsusilə "Qarabağ"ın futbolçuları bu baxımdan nümunə idi. Fransızlar zədələnəndə, hətta uğursuz oyun epizodu olanda futbolçularımız, kapitan kimi Qara, Şahruddin və başqaları xoş məram göstərir, rəqibə təsəlli verirdilər. Futbolçuların bir-birinə qarşılıqlı hörməti hakimlərin matçı daha rahat idarə etməsini şərtləndirirdi. Referi də oyun ərzində obyektivliyi qorumağa meyilli idi və heç bir kobud səhvlə yadda qalmadı. Nə vurulan qollarda mübahisə yarandı, nə də oyun önəmli hakim səhvləri ilə yadda qaldı. Avropanın diqqət mərkəzində olan matç mübahisəsiz, obyektiv idarəçilik, möhtəşəm qələbə ilə sona çatdı və Azərbaycan xalqını sevindirdi. Davamı gəlsin".