“Qarabağ” çox yaxşı, eyni zamanda iddialı bir qrupa düşüb. Hər bir komanda güclü çempionatlarda çıxış etməklə yanaşı, həm də iddialıdı. Bundesliqanın liderinə qarşı oyun həqiqətən çox çətin keçdi. Həm ab-hava, həm də rəqibin hazırda yaxşı formada olması “Qarabağ”ın gözləniləndən daha yaxşı çıxış etməsini şərtləndirdi. İlk dəqiqələrdən bundesliqanın keyfiyyətini gördük. Əməlli-başlı basqı var idi. Açığı, mən komandamızın bu basqıdan necə çıxacağını gözləyirdim. Amma “Qarabağ” həqiqətən təcrübəli olduğunu göstərdi. Uzun illər belə böyük komandalara qarşı oynayıb. Amma əlbəttə, bundesliqa bizim çempionatdan müqayisəolunmaz dərəcədə səviyyəlidi. İlk 15 dəqiqədəki basqını nəzərə almasaq, “Qarabağ” rəqibindən heç də geri qalmadı. Çempionatda “Kəpəz”lə oyunda da, indi də futbolçuların üzündə “Viktoriya” ilə matçlardan qalan məyusluğu gördüm. Lakin komanda oyununu göstərməyi bacardı. Təmsilçimizin bundesliqa klubuna qarşı belə oynaması həqiqətən çox sevindiricidi. Bu görüş bizə ümid verdi ki, qrupun qalan komandalarına qarşı da oynamaq olar. Əlbəttə, keyfiyyətli futbolçulara qarşı mübarizə aparmaq asan deyil. Lakin “Qarabağ” göstərdi ki, bu mümkündü. Üstəlik məğlubiyyətə də layiq deyildik. Bu, hakim səhvləri nəticəsində baş verdi. Ümid edək ki, “Qarabağ” bu qrupdan çıxacaq. Yetər ki, hakim səhvləri olmasın… Əlbəttə, “Viktoriya” ilə oyunun psixoloji gərginliyindən xilas olmaq o qədər də asan deyil. İstənilən halda, təcrübəli məşqçi var, komandanı toparlamağa çalışır. Lakin bu, qısa müddətdə mümkün deyil. Sanki “Frayburq” “Qarabağ”ı ayıltdı. Belə basqı ilə istənilən komanda üzləşə bilər. Burda da həm o təzyiq, həm də hakimin qərarları komandaya təsir etdi. Künc zərbəsindən sonra cərimə meydançasında futbolçuların bir-biri ilə toqquşması normaldı. Ona qalsa, gərək hər oyunda 10-12 penalti təyin edəsən. Orda Zubiri yıxdılar. Rəqibin epizodunda penalti təyin etmişdinsə, bu da yetərli idi. Stadionun ab-havası da möhtəşəm idi. Hələ yaxşı ki, “Qarabağ” o basqıya dözə bildi. Səfərdən xalla da qayıtmaq mümkün idi. Fikrimcə, psixoloji gərginliyin səbəbi komandanın Almaniya təmsilçisiylə qarşılaşması deyildi. “Qarabağ” böyük komandalarla dəfələrlə qarşılaşıb. Futbolçular Çempionlar Liqasının qrupunda oynamaq şansını qaçırdı deyə, məyusluq hələ də hiss olunurdu”.