Jan-Pyer Papen tarixdə iz buraxmış oyunçulardan biridi.

1987-92-ci illərdə ''Marsel''in heyətində ardıcıl 5 mövsüm Liqa-1-in bombardiri olan fransalı forvard 1991-ci ildə ''Qızıl top''u da qazanıb. Düzdü, onun ''Milan'' karyerası ''Marsel''dəki qədər parlaq keçmədi. Amma Papen ''Milan''ın heyətində 1993/94-də ÇL-in qalibi oldu. Son illər gözdən itən və Fransanın aşağı liqa klublarında məşqçi kimi çalışan 58 yaşlı Papen bugünlərdə ''Sportweek'' nəşrinə müsahibə verib.

- Piolinin ''Milan''da gördüyü işi necə qiymətləndirirsiz?
- Bilirdim ki, Pioli ''Milan''ı layiq olduğu yerə qaytaracaq. Skudetto uğrunda mübarizə aparmaq bu klubun qanında var. Milanellonun sehri bu prosesi bir qədər də sürətləndirdi. Bundan sonra inanıram ki, ''Milan'' İtaliyada bu statusda möhkəmlənəcək və Çempionlar Liqasında özünü yaxşı tərəfdən göstərəcək. Ötən mövsümün təcrübəsi komandaya çox yardım edəcək.

- Hemyerliniz Jirunun təcrübəsinə də böyük ehtiyac duyulacaq. O, hətta yoxlama matçlarında da qol vurduqdan sonra formanın üzərindəki skudettonun şəklini öpürdü…
- Bu, təbii və ürəkdən gələn bir jestdi. Məndə olduğu kimi ''Milan'' Jirunun da qəlbindədi. Bu klubun aurası dərhal orda oynayan futbolçulara təsir edir. Başa düşürsən ki, orda oynamaq şansı qazanmaqla çox böyük xoşbəxtlik əldə etmisən. Bu yay Jiru ilə söhbət etmək fürsətim oldu. Hiss etdim ki, kluba çox bağlanıb. Hər şey xoşuna gəlir və qol vurub fanatları coşdurmaqdan böyük zövq alır. ''San Siro''ya və bu stadionun tarixinə heyrandı. Xüsusilə də ora 80 min insan toplaşanda inanılmaz atmosfer olur.

- Düşünürsüz ki, Jiru ''Milan''ı daha da güclü edib?
- Əlbəttə. O, qalib gəlməyə alışan əsl çempiondu. Güclü rəqabətə baxmayaraq, ''Milan''a çox tez uyğunlaşmağı bacardı. Əminəm ki, bu mövsümü ötənilkindən də yüksək səviyyədə keçirəcək. Düzdü, onun, məsələn, İbrahimoviç qədər liderlik keyfiyyətləri yoxdu. Elə də çox danışmır. Amma əsas matçlarda meydanda fərq yaratmağı bacarır.

- Bu mövsüm onun Oricinin timsalında yeni rəqibi peyda olub.
- Piolinin onlara eyni mövqenin oyunçuları kimi baxıb-baxmadığını bilmirəm. Çünki oyun keyfiyyətləri fərqlidi. Jiru klassik mərkəz hücumçusudu. Orici isə daha hərəkətlidi. Cinahda da oynaya və Jiruya yardım edə bilər. Onların eyni anda start heyətində meydana çıxmasında bir problem görmürəm. Amma hər şey baş məşqçinin taktikasından və oyun sxeminden asılı olacaq.

- Bəs Papen Jiru ilə hücumda tandem təşkil edə bilərdimi? Fanatların fikrincə, sizin oyun tərzinizdə müəyyən bənzərliklər var.
- Əsas bənzərlik qol vurmağa can atmağımızdı. Jiru kimi mən də bunun üçün meydanda hər şey edirdim. Mən daha cəld idim və lazım gələndə arxaya çəkilib meydanın dərinliyindən oynaya bilirdim. Jiru isə daha çox komanda yoldaşlarından asılı olan və özünü rəqibin cərimə meydançasında suda balıq kimi hiss edən bir futbolçudu. Fikrimcə, indiki ''Milan'' üçün o, ideal oyunçudu.

- Sizcə, qarşıdakı mundialda Fransa yığmasında Jirunun start heyətində oynaması daha realdı, yoxsa Mayk Menyanın?
- Dünya çempionatının startına hələ 3 ay var. Hər şey baş verə bilər. Olivyenin özünü sübut etməsinə ehtiyac yoxdu. O, dünya çempionudu. Deşam onun keyfiyyətlərini və komandaya nə verə biləcəyini gözəl anlayır. Menyan dünyanın ən yaxşı qapıçılarından biridi. Hazırda Lyoris yığmanın əsas qapıçısı kimi görünür. DÇ-yə qədər olan müddətdə Menyanın əsas heyət üzvünə çevrilib-çevrilməyəcəyini bilmirəm. Amma o, yığmanın gələcəyidi. Menyan uzun illər yığmada əsas qapıçı funksiyasını daşıyacaq.

- Teo Ernandesin indiki dəyəri nə qədərdi?
- Bilmirəm, rəqəmlərdə o qədər də güclü deyiləm. Amma onu bilirəm ki, Teo inanılmaz futbolçudu hər mövsüm oyununu daha da gücləndirir. Bunda Piolinin də rolu az deyil. Məşqçi elə təşkilatlanmış komanda qurub ki, hər futbolçu ən güclü keyfiyyətlərini göstərməyi bacarır. Teo fiziki cəhətdən güclüdü. Müdafiə planında da ''artırır''. Top ayağında olanda hər şey etməyə qadirdi. Ötən mövsüm ''Atalanta''ya Messi tərzində vurduğu qolu xatırlamaq kifayətdi.

- Kalulunu artıq əsas heyət üzvü saymaq olarmı? Kyaer onunla rəqabət aparmalı olacaq?
- Kalulu ötən mövsüm karyerasında irəliyə doğru çox mühüm bir addım atdı. Özünəinamı yüksək səviyyədədi, üstəlik müdafiənin mərkəzində Tomori ilə əla anlaşır. Amma ''Milan''da əsas heyətin sabit üzvü yoxdu. Bu yazılmamış qanundu və hamı buna uyğunlaşır. Məsələn, mən bunu anlamaqda çətinlik çəkdim və ona görə də klubdan tez ayrıldım. İndi olsaydı, tam fərqli qərar qəbul edərdim.

- Bakayokoya komandada yenidən özünə yer tapmaq heç cür mümkün olmadı. Sizcə, o, nəyi düzgün etmədi?
- Bakayoko yaxşı yarımmüdafiəçidi. Sadəcə, ötən mövsüm rəqabət çox güclü idi. Onun mövqeyində Tonali, Bennaser, Kessye kimi futbolçular var idi.

- Yasin Adli özünə çox güvənir və özünü göstərmək üçün alışıb-yanır. Artıq italyan dilini də öyrənib.
- Əla. Dili bilmək çox vacibdi. Mən italyan dilini iki aya öyrənmişdim. İsveçdəki AÇ-1992-də boş vaxtım olan kimi dili öyrənirdim. Ora özümlə birlikdə qrammatika kitabları götürmüşdüm. Adli yüksək səviyyədə oynamağı bacardığını göstərmək üçün hər cür keyfiyyətə malikdi: zərbə, ötürmə, sürət, oyunu oxumaq bacarığı, texnika. Yeganə axsayan yeri müdafiə olunmaq qabiliyyətidi. Top onda olmayanda müdafiə olunmağı öyrənməlidi. Bunu bacarsa, mütləq İtaliyada özünü göstərəcək. Adli ağıllı oyunçudu və tez öyrənməyi bacarır. PSJ-nin akademiyasında yetişib. Orda gənclər üçün əla şərait və atmosfer var.

- İndi ''Milan''da olan hansı həmyerlinizin sizin dönəminizdəki komandada olmasını istərdiz?
- Bizim ''Milan'' ideal komanda idi. İndikilərdən heç kim o komandada start heyətinə düşə bilməzdi! Amma bir oyunçu seçməli olsam, Teoya üstünlük verərdim.

- Axı o, Paolo Maldini ilə rəqabət aparmalı olardı.
- Təsəvvür edin ki, Paolo meydana çıxa bilmədiyi vaxtlarda onu dünya səviyyəli bir futbolçu əvəzləyərdi.