- Gəlin hücum edək!

- Biz o qədər zəifik ki, silahlarımızı belə güclə daşıyırıq, hücum haqda necə fikirləşə bilərsən?

- Daha bir gün keçsə, aclıqdan ya meyidləri yeyəcək, ya da “qırmızılar”a əsir düşəcəyik. İtiriləcək heç nəyimiz yoxdu. Onlar hücum edəcəyimizi gözləmir. Ona görə də gəlin irəli atılaq və onları məhv edək.

"38-ci paralel" filmində cəsur döyüşçü Li Cen Txenin komandirinə müraciətindən...

Rejissör Kan Cegünün lentə aldığı müharibə filmindəki kimi itiriləsi nəyisə olmayan, maliyyəsi zəif, heyəti kasad "Qəbələ" də ötən mövsüm heç kimin gözləmədiyi halda, hücum futbolu oynamaqla güclü rəqibləri üzərində qələbələr qazanıb futbol ictimaiyyətini heyran etdi. Bölgə təmsilçisi yaradıcı oyunu ilə ötən mövsümün ilk yarısını ikinci pillədə tamamladı. Qış fasiləsindən sonra komanda nə qədər mübarizə aparsa da, mövqeyini qoruya bilməyərək, çempionatı 4-cü yerdə tamamladı. Buna rəğmən, "qırmızı-qaralar" Konfrans Liqasına vəsiqəni təmin etdi. Çoxları Elmar Baxşıyevin və yetirmələrinin zəhmətini yerə vuraraq onların təsadüfən avrokuboka vəsiqə qazandığını və "Sabah"ın qitəmiqyaslı turnirə yollanmağı daha çox haqq etdiyini söyləyirdi.

"Qəbələ" yay “transfer bazarı”nda cəmi 4 futbolçunu sıralarına əlavə etsə də, əsas heyət üzvlərinin çoxunu qoruya bildi. Komandanı gözü götürməyənlər qalan klublarımızla müqayisədə "qırmızı-qaralar"ın Konfrans Liqasında qapazaltı olacağını düşünürdü. Lakin "sən saydığını say, gör fələk nə sayır" deyimi bu dəfə də qüdrətini göstərdi. Ən köklü klubumuz "Neftçi" debütant "Aris"lə ilk qarşılaşmada hər cəhətdən rəqibinə uduzdu. "Zirə" doğma meydanda qorxaq futbol oynamaqla “Makkabi” önündə darmadağın oldu. "Qəbələ" isə səfərdə özündən güclü "Fehervar"a qarşı ilk dəqiqələrdən açıq futbol oynadı, hesabı açdı, hətta fərqi artırmaq üçün real şanslar da yaxaladı. Lakin ani səhvdən buraxdığı top, ardınca İlkin Qırtımovun dilinin qatlanması və məcburi əvəzetmə komandaya həm psixoloji təsir etdi, həm də oyun planını dəyişdi. Elmar Baxşıyevin yetirmələri yekunda 1:4 hesablı məğlubiyyətlə meydanı tərk etsə də, qalan təmsilçiilərimizdən fərqli döyüşdü, sadəcə, bəxti gətirmədi. "Qəbələ"nin səfərdə sərgilədiyi oyun 1815-ci ildə Vaterloo savaşında məğlub olan Fransa ordusunun döyüşçülərinin, ayrı-ayrı birliklərinin, sərkərdələrinin qələbəsini xatırlatdı.

Bir həftə sonra cavab görüşündə "Zirə"nin gecikən oyanışı işə yaramadı. "Neftçi" yenə oyun planında bərbadlığıyla göz oxşayıb yalnız futbolçuların fərdi keyfiyyəti sayəsində mərhələ keçdi. Elmar Baxşıyevin komandası isə doğma meydanda da cəngavər kimi döyüşdü. Qəbələ şəhər stadionunda macarlar qüdrətli Atillanın qəhrəmanlıqlarından ilhamlanmaq əvəzinə "qırmızı-qaralar" Romanı lərzəyə gətirən sərkərdədən ruhlanaraq meydanda hunlar kimi savaşdı. Bölgə təmsilçisi qalxansız döyüşən cəngavərlər kimi irəli atılıb macarları üstələdi. Felipe Santos, Ruan Renato və Rövlan Muradov çoxsaylı imkanlarını qola çevirə, Səlahət Ağayev də qapısının toxunulmazlığını qoruya bilsəydi, mərhələ keçmək şansı çox olacaqdı. Təəssüf ki, ehtiyat qüvvənin olmaması, müdafiədəki boşluqlar, İsnik Aliminin doğma mövqeyində oynamaması da "Qəbələ"nin əleyhinə işlədi. Amma "qırmızı-qaralar" "Neftçi"dən fərqli meydanın hər qarışı uğrunda mübarizə aparıb, güclü rəqibə qarşı cəsarətli, açıq futbol oynamaqla qələbə qazandı.

Məşhur ifadə var: "Həmişə güclü qalib gəlmir. Əsas əllərdəki və düşüncələrdəki sürətdi". Doğma meydanda "Fehervar"ı üstələməklə Baxşıyev bu aforizmi nümayiş etdirdi. Oyundan sonra 42 yaşlı mütəxəssisin "komandam getdikcə daha yaxşı olacaq" deməsi də qarşıdan gələn ölkə çempionatı ilə bağlı nikbinliyinin göstəricisidi. Komandanın ənənəsinə sadiq qalaraq yaradıcı futbol sərgiləyəcəyi şübhə doğurmur. Ötən mövsüm "Neftçi"də çıxış edən Ramon Maçadonun transferi də "ən yaxşı müdafiə hücumdu" prinsipinin üstün tutulacağını bir daha sübut edir.

Rus yazıçı Filip Leonidov deyir: "Kəmiyyətlə qalib gəlirlər, keyfiyyətlə fəth edirlər". Avqustun 5-də start götürəcək növbəti ölkə çempionatında "Qəbələ" kəmiyyətdə ləngisə də, keyfiyyətli oyunu ilə çoxlarına başağrı olacaq.

ABDULLA İSMAYILOĞLU