Azərbaycan premyer-liqasının sonuna iki tur qalsa da, Konfrans Liqasına vəsiqə verən 3-cü və 4-cü yerlərin sahibləri müəyyənləşməyib.

"Football-plus.az" xəbər verir ki, hazırda "Zirə", "Qəbələ” və “Sabah" arasında ölüm-qalım savaşı gedir.

Görəsən, adıçəkilən klublardan hansılar bu mübarizədə daha şanslıdı? Məsələ ilə bağlı fikirlərini öyrənmək Tərlan Əhmədova müraciət etdik. Təcrübəli mütəxəssis “Qəbələ”ni bu yarışda “Sabah”da daha üstün hesab etdiyini dilə gətirdi:

"Qarabağ"ın çempionluğu qazanması, "Neftçi"nin 2-ci yeri təm etməsindən sonra çempionatda intirqanı ölməyə qoymayan Konfrans Liqasına vəsiqə verən 3-cü və 4-cü yerlər uğurunda mübarizədi. Mən "Zirə" ilə "Sabah"ı daha şanslı sayıram. Rəşad Sadıqovun 3-cü pilləni əldən verəcəyinə inanmıram. "Sabah" güclü oyunçulara malikdi. Qış fasiləsindən sonra komanda həm oyun planında, həm də nəticələrində artırıb. 4-cü yerə "Sabah" daha şanslı və layiqdi. "Qəbələ"yə gəlincə, bunu həmişə demişəm: komanda oyun fəlsəfəsini dəyişməlidi. Mövsümə gözlənilmədən çox yaxşı başladılar, açıq futbol oynadılar, güclü rəqibləri məğlub edərək 2-ci pilləyə yüksəldilər. Amma qış fasiləsindən sonra rəqiblər "Qəbələ"ni yaxşı təhlil etdi. Belə ki, komandanın sərgilədiyi açıq futbola qarşı rəqiblər ağıllı taktika qurdular. Komandanın ehtiyat qüvvəsinin zəifliyini də nəzərə alsaq, gec-tez hücum taktikasının tükənəcəyi şübhəsiz idi. "Qəbələ" bütün komandalara qarşı eyni taktikanı, oyun üslubunu sərgiləyir ki, bu da yalnışdı. Komanda qış fasiləsindən sonra mövqeyini qorumaq üçün mütləq taktiki-texniki dəyişikliklər eetməli, müdafiə futboluna daha çox üstünlük verməli, oyununu rəqiblərin gücünə görə tənzimləməliydi. Bir-birini əvəz edən məğlubiyyətlər, ardıcıl xal itkilərindən çox gec nəticə çıxardılar. "Zirə" və "Neftçi" ilə matçlarda komanda oyun fəlsəfəsini dəyişərək qələbə qazandı. Hər iki rəqiblə matçda aşkar göründü ki, müdafiədə qapanmaq və rəqibi əks-hücumda yaxalamaq daha uyğun taktikadı. Baş məşqçinin işinə qarışmaq kimi çıxmasın, amma Elmar Baxşıyev qış fasiləsində bu taktika üzərində işləsəydi, komanda bu gün ən azı 3-cü pillədə möhkəm dayanardı. Qarşıdakı 2 turda "Qəbələ"nin şanslarını yüksək görmürəm".

ABDULLA İSMAYILOĞLU