MHL-in yeni mövsümündə ən azı 5 qadın baş menecerin assistenti vəzifəsini daşıyacaq.

“Vaşinqton” da artan tendensiya fonunda kənarda qalmayıb və liqa tarixində ilk dəfə qadını məşqçi korpusuna gətirib. Paytaxt təmsilçisinin farm-klubunda iki mövsüm keçirən Emili Engel-Natske əsas komandanın videoəlaqələndiricisi kimi çalışacaq. O, bundan sonra “Kepitalz”ın öz və rəqiblərinin oyunlarından videoçıxarışlar edəcək, həmçinin hokkeyçilərin hər biri üçün fərdi videohesabat hazırlayacaq.

Emili Koloradoda dünyaya gəlib və erkən yaşlardan hokkey vurğunudu: “Bu idman növü həmişə xoşuma gəlib. Məktəbin yuxarı sinfində oxuyarkən buz üzərində çox vaxt keçirirdim, qapıçı mövqeyində oynadığıma görə xoşbəxt idim”.

Təbii ki, Emili həmin vaxt hokkeyin həyatında belə vacib yer tutacağını bilmirdi. 2013-cü ildən ABŞ Hokkey Federasiyasında işə başlayan xanım ardından ölkənin kişilərdən və qadınlardan ibarət gənclər yığmalarının videoməşqçisi oldu: “Kino sənayesinə düşmək istəmirdim, ona görə ki, idmanı sevirəm. Mənim işim bir-birindən fərqli fəaliyyət sahələrini gözəl şəkildə bir araya gətirməkdi”.

Emilinin “kino” sözünü dilə gətirməsinin səbəbi var. O, “Vaşinqton”un klub sistemində işə düzələnə qədər Kolorado Universitetində kino istehsalı sahəsində dərəcə alıb. Yalnız bundan sonra əlinə Viskonsin ştatında qadın basketbol komandası ilə işləmək imkanı düşüb: “Müasir texnologiyalar imkan verir ki, müxtəlif rakurslardan oyunları diqqətlə izləyəsən. Oyun günləri hədsiz çox vaxt alır. Məşqlərdə hər şeyə baxıram, oyunlar vaxtı çalışıram, müəyyən aspektlərə diqqəti yönəldirəm, lazımi qeydlər aparıram, sonra isə zəruri informasiyanı hokkeyçilərə və məşqçilərə çatdırıram”.
Klubda Emilinin peşəkarlıq keyfiyyətlərindən razıdılar, onun vəzifə yüksəlişi ilə bağlı isə baş məşqçi Piter Laviolett danışıb: “Emili bunu tam haqq edir. Məşqçi korpusunun həqiqətən keyfiyyətli mütəxəssislə tamamlandığını hiss edirik. O, son iki ili bizim təşkilatda keçirib və möhtəşəm işlər görüb. Emili vəzifə səlahiyyətlərinin öhdəsindən parlaq şəkildə gəlir və bu mənim üçün çox vacibdi”.
Emili AHL-də komandanın məşqçi korpusunun üzvü olan ilk xanımdı, indi isə MHL-də bu mənada cığıraçan rolunu oynayacaq. Amma o, məsuliyyət yükündən qətiyyən çəkinmir: “Hamı əvvəldən mənə deyirdi ki, MHL-ə düşmək çox çətin və praktiki cəhətdən mümkünsüz olacaq. Ancaq düzünü desəm, mən həqiqətən inadkar və qətiyyətli adamam. Bu mənim üçün yeni çağırışdı və cəlbedici macəra olacaq. Qadınları belə güclü liqada müxtəlif rollarda görməyimiz çox yaxşıdı. Ümid edirəm ki, bu qapı həmişə açıq olacaq, qadınların klublarda hansısa vəzifəyə təyinat alması isə xəbərlərdə qeyri-adi hadisə kimi işıqlandırılmayacaq”.