Dünya futbolu
85
3.07.2022, 10:32
Pyaniç ümidləri doğrulda bilməməsini nə ilə izah etdi?
''Beşiktaş''da birillik icarə müddəti başa çatan və ''Barselona''ya geri dönən Miraləm Pyaniç ''Hürriyət'' nəşrinə açıqlamalar verib.
Təcrübəli futbolçunun Türkiyə karyerasının uğurlu alındığını söyləmək çətindi. Bir dönəm zədəli olan 32 yaşlı bosniyalı yarımmüdafiəçi cəmi 26 rəsmi oyuna çıxa bildi və qol vurmasa da, 4 məhsuldar ötürmə ilə yadda qaldı. Pyaniç bunun bir vida olmadığını və bir gün yenidən ''Beşiktaş''a qayıdacağını bildirib:
''Bura böyük ümidlərlə gəlmişdim. Bir il öncə maddi çətinliklərə və dar heyətə baxmayaraq, 2 titul qazanmış bir komandaya gəlmişdim. ''Beşiktaş''ın böyüklüyünün fərqindəydim. Başqan Ahmet Nur Çəbi ilə cəmi 2 dəqiqə söhbət etdikdən sonra transferə razılıq verdim və İstanbula gəldim. Əlimdən gələni etməyə çalışsam da, araya girən pandemiya və zədələr planlarımı alt-üst etdi. Türkiyəni öz ikinci vətənim sayıram. Amma karyeramı İtaliyada davam etdirmək istəyirəm. ''Beşiktaş''a çempionluq borcum var və onu bir gün mütləq ödəyəcəm. Bir komandanın başına gələ biləcək ən böyük şanssızlıqları yaşadıq. ÇL-də koronavirus və zədələr üzündən gənc oyunçularla oynamaq məcburiyyətində qaldıq və xal toplaya bilmədik. Bütün bunlar komandanın psixoloji durumuna təsir etdi. Amma bu çətin dönəmdə sağ olsunlar, həm rəhbərlik, həm də baş məşqçi Sərgən Yalçın arxamızda durmağa çalışdı. Sərgən güclü xarakterə malikdi. Həm onunla, həm də komanda yoldaşlarımla münasibətlərim əla idi. Fanatlar isə sadəcə möhtəşəm idi. Bu yaşıma qədər bir çox klubda və stadionda oynamışdım. Amma ''Vodafon Park''dakı atmosferi daha öncə heç yerdə görməmişdim. Hər matçda 90 dəqiqə ərzində rəqibi təzyiq altında saxlayırlar. ''Beşiktaş'' fanatları az qala ölünü də dirildib oynamağa məcbur edər! Onlar hər zaman mənə sahib çıxdılar. Bu klubun bir parçası olmaq mənim üçün böyük fəxr oldu. Ona görə də vidalaşmıram və bir gün mütləq geri dönəcəm. Çünki mən və ailəm İstanbulun xəstəsiyik. Burda bir titul qazandım. Superkuboku başımın üzərinə qaldıranda inanılmaz sevinc yaşadım. Unudulmaz matçlar arasında ilk dövrədə ''Qalatasaray''ı 2:1 hesabı ilə yendiyimiz derbini qeyd edərdim. Əla atmosfer var idi. Komanda şəklində güclü oynadıq və rəqibin öz güclü tərəflərindən istifadə etməsinə imkan vermədik. Bundan başqa ilk dövrədə ''Kayserispor'' və ''Fənərbaxça''ya qarşı keçirdiyimiz oyunlar da çox həyəcanlı alınmışdı. ''Trabzonspor''un layiqli şəkildə çempion olduğunu düşünürəm. Çox yaxşı və geniş heyətə malik idilər. Onları təbrik edirəm. Çempionluqda onların fanatları da mühüm rol oynadı. ''Fənərbaxça''nın da yaxşı heyəti var. Məsut Özilin komandada olması mühüm amildi. Türkiyənin futbol mentaliteti Avropadakından çox fərqlənir. Komandalar fiziki cəhətdən güclü olmağa çalışırlar. Amma sistem və taktika ön planda olmalıdı. Valerien İsmael yeni mövsüm üçün çalışır. O, komandaya Avropadakı sistemi oturtmağa çalışır. Ona güvənmək və səbr etmək lazımdı. Çünki Türkiyədə gündəlik uğura önəm verirlər. Bu da futbolçuların üzərində təzyiq yaradır''.
