Pyaniç "Beşiktaş"la vidalaşdı
''Beşiktaş''ın ötən yay ''Barselona''dan böyük ümidlərlə birillik icarəyə götürdüyü Miraləm Pyaniç klubla vidalaşıb.
Təcrübəli bosniyalı yarımmüdafiəçi ''Qartal''ın heyətində qazandığı ölkə superkuboku ilə olan şəklini paylaşaraq bunları yazıb:
''Vidalaşmaq zamanı çox tez gəldi. Sizlərdən ayrılacağım üçün üzgünəm. Burda əla insanlar və əla bir klub tanıdım. Xüsusilə də möhtəşəm fanatlarımızı tanıdım. O stadionda və o atmosferdə oynamaq mənim üçün böyük fəxr oldu. Hamımız üçün çətin mövsüm oldu. Daha çox kubok qazanmaq istərdim. Amma ən azından kluba bir superkubok qazandırdıq. Mən, oğlum və ailəm hər zaman bu klubun fanatı kimi qalacağıq. İnanıram ki, gələcəkdə yollarımız yenidən kəsişəcək. Hər zaman Qara Qartal''.
Pyaniçin Türkiyə karyerasını uğurlu saymaq olmaz. Ünlü futbolçu tez-tez zədələndiyi üçün komandaya gözlənilən faydanı verə bilmədi. 32 yaşlı futbolçu mövsüm ərzində cəmi 26 oyuna çıxdı və qol hesabını aça bilmədi. Pyaniç yalnız 4 məhsuldar ötürmə ilə yadda qaldı.
Digər xəbərlər
