Öz aramızdı, böyük ehtimalla, Mateuş Koxalski "Qarabağ"ın təlim-məşq toplanışına qatılmayıb.

Birincisi, ona görə ki, klubun sosial şəbəkə hesablarında məşqlərdən paylaşdığı şəkillərdə onun fotosu yoxdu. İkincisi və ən əsası, "köhlən atlar"ın "Zirə"yə qarşı keçirdiyi yoxlama matçının iştirak ərizəsində qapıçının adına rast gəlmədik. Üstəlik ağdamlılar dünən yeni qapıçı transferini açıqladı. Məlum oldu ki, Bosniya və Hersoqovina millisinin və Xorvatiya "Riyeka"sının üzvü olan Martin Zlomisliç bundan sonra Qurban Qurbanovun komandasının şərəfini qoruyacaq.

Əlbəttə, bu məsələylə bağlı həqiqəti öyrənmək üçün klubun Kommunikasiya departamentinin rəhbəri Anar Hacıyevə müraciət etdik. Lakin qarşı tərəfdən sorğumuza cavab gəlmədi.

Hər halda, Koxalski bu gün Avstriya yollanan komandanın heyətində də yer almayıb. Belə durum qapıçının "Qarabağ"dan ayrılmasının qətiləşdiyini göstərir.

KƏNAN BAHADIR