“Əsas mərhələdə nəinki iki, üç komanda ilə təmsil oluna bilərik” – Elmar Baxşıyev
“Araz-Naxçıvan”dan ayrılandan sonra Elmar Baxşıyevin işsiz günləri davam edir. Bu barədə “Football-plus.az”a mütəxəssis özü məlumat verib. O, hələ hansısa klubdan təklif almadığını bildirib:
“Azərbaycandayam. Məcburiyyətdən istirahət edirəm (gülür). Nə premyer-liqa, nə də 1-ci klublarından təklif almışam”.
Elmar bəydən avrokuboklarda çıxış edəcək klublarımızdan gözləntilərinin hansı yöndə olduğunu da soruşduq. Onun cavabı:
“Hər şey əvvəl hazırlıq prosesindən, sonra isə püşkdən asılıdı. Xatırlayırsızsa, “Araz-Naxçıvan”da çalışdığım vaxt Yunanıstan “Aris”iylə qarşılaşmalarda rəqib favorit sayılırdı. Ancaq nəticə fərqli oldu. Gördüyüm qədər, bütün klublar hazırlığa başlayıb. Məncə, “Sabah” Çempionlar Liqasının, “Qarabağ” Avropa Liqasının əsas mərhələsində çıxış edə bilər. Hər iki klubun bunun üçün böyük potensialı var. “Zirə” ilə “Neftçi” də yaxşı hazırlaşsa, Konfrans Liqasının əsas mərhələsinə vəsiqə qazanacaqlar. Düşünürəm ki, əsas mərhələdə nəinki iki, üç komanda ilə təmsil oluna bilərik. Lakin yenə deyirəm ki, hər şey hazırlıq prosesindən asılıdı. Hamısı hazırlığı davam etdirir. Hətta mətbuatdan oxuyuram ki, ən tez “Zirə” başlayıb. Belədə bu komanda da əsas mərhələyə vəsiqə qazana bilər”.
KƏNAN BAHADIR
Digər xəbərlər
