Son çempion statusunda keçirdiyi cari ''futbol ili''ndə qeyri-sabit təsir bağışlayan və 6-cı pillə ilə kifayətlənməli olan ''Beşiktaş''da mövsüm bitən kimi ayrılıqlar başladı.

Komandadan ayrıldığını açıqlayan ilk futbolçu Miraləm Pyaniç olmuşdu. Ona Domaqoy Vida da qoşulub. Müqavilə müddəti bitən bu oyunçu ilə rəhbərlik mövsümboyu heç cür anlaşma əldə edə bilmədi. Qeyd edək ki, 33 yaşlı xorvatiyalı müdafiəçi ''Qartal''a 2018-in yanvarında azad agent statusunda gəlmişdi. Bu müddətdə o, ''ağ-qaralar''ın heyətində 164 rəsmi oyuna çıxaraq 16 qol, 1 məhsuldar ötürmə ilə yadda qaldı və 1-i çempionluq olmaqla 3 titul qazandı. Maraqlıdı ki, Vida ötən həftəiçi klubun tibbi personalının 12 işçisinə ''İphone 13 Pro Max'' markalı bahalı telefon hədiyyə etmişdi. Vida bununla İstanbula gəldiyi ilk gündən bəri onunla yaxından maraqlanan tibbi personalın üzvlərinə özünəməxsus şəkildə jest etmiş oldu. Bu arada başqan Ahmet Nur Çəbi qəribə açıqlama verərək bildirib ki, Vida komanda yoldaşları ilə vidalaşmasına baxmayaraq, onunla yeni müqavilə ilə bağlı danışıqlar davam edir. Məşhur futbolçu yeni şərtləri qəbul edəcəyi halda komandada qala bilər. Dünən ''Beşiktaş''dan ayrılan 3-cü futbolçunun da adına aydınlıq gəldi. Söhbət Mişi Batşuayidən gedir. Təcrübəli forvard müqavilə ilə ''Çelsi''yə məxsusdu və İstanbul nəhəngində icarə əsasında top qovurdu. Belçikalı futbolçu həm ümidləri doğrulda bilmədiyindən, həm də məvacibi yüksək olduğundan ''Beşiktaş'' onu daimi əsasda transfer etmək istəməyib. Sosial şəbəkədə fanatlarla vidalaşan 28 yaşlı futbolçu istanbulluların heyətində ümumilikdə 42 rəsmi oyuna çıxaraq 14 qol, 5 məhsuldar ötürməlik performans sərgilədi və 1 titul qazandı.

Ümumiyyətlə, bu üç futbolçu ilə yanaşı, daha 11-nin ''Beşiktaş''la müqavilə müddəti bu yay bitir. Söhbət Atiba Hatçinson, Can Bozdoğan, Kayl Larin, Oğuzhan Özyakup, Güvən Yalçın, Gökhan Törə, Mehmet Topal, Fabris N'Sakala, Cermeyn Lens, Adəm Lyayiç və Duqlas Santosdan gedir. Uzun müddətdi əsas komandadan kənarlaşdırılan və fərdi məşq edən son 4 oyunçunun ayrılacağı dəqiqdi. Eləcə də Özyakup, Törə və Topal komandadan ayrılacaq. Hatçinson, Bozdoğan, Larin və Yalçının gələcək taleyi isə qeyri-müəyyəndi. 39 yaşlı Hatçinson karyerasını bitirməyi planlaşdırmır. O qarşıdakı mundialda Kanada yığmasının heyətində oynamağa hazırlaşır və bu üzdən birillik təklif gözləyir. Bozdoğanın müqavilə ilə məxsus olduğu ''Şalke-04''lə danışıqlar davam edir. Güvən Yalçının komandada qalmaq ehtimalı yüksəkdi. Larinin isə əksinə, başqa kluba yollanmaq ehtimalı böyükdü. Bundan başqa, sol cinah müdafiəçisi Rıdvan Yılmaz ''Torino'' və ''Ayntraxt''dan təklif alıb. ''Beşiktaş'' hələ birillik müqaviləsi olan bu futbolçunun satışından 4-5 milyon avro qazana bilər.

ƏLİ