Dünya çempionatında Türkiyənin yer aldığı D qrupunda da 3-cü tura yekun vuruldu.

İlk iki turdan sonra mübarizəni davam etdirmək şansını itirən Türkiyə meydan sahibi ABŞ ilə üz-üzə gəldi. Vinçentso Montella gözlənildiyi kimi rotasiyaya əl ataraq böyük tənqidlərə məruz qalan Kərəm Aktürkoğlu və Hakan Çalhanoğlu kimi futbolçuları ehtiyatda saxladı.

Paraqvayla oyunda artıq 64-cü saniyədə qol buraxan ''ay-ulduzlular'' yenə erkən - 3-cü dəqiqədə hesabda geri düşdülər. Amma əvvəlki iki oyundan fərqli olaraq bu dəfə qardaş ölkənin komandası dönüş yarada bildi. Əvvəlcə Barış Alpər Yılmazın ötürməsini Arda Gülər qola çevirdisə, hissənin ortalarında Ərən Elmalının ötürməsindən sonra Orkun Kökçü fərqləndi.

Maraqlıdı ki, Türkiyənin ilk iki oyunda qapıya endirdiyi ümumilikdə 62 zərbədən heç biri qolla nəticələnməmişdisə, bu qarşılaşmada komandanın ilk iki zərbəsi qolla nəticələndi. Arda Gülər 21 yaş 120 günlüyündə fərqlənməklə Türkiyənin heyətində mundialda qol vuran ən gənc futbolçuya çevrildi! Əvvəlki rekord DÇ-2002-də 21 yaş 275 günlüyündə Kosta-Rikaya qol vuran Əmrə Belözoğluya məxsus idi. Qəribədi ki, Türkiyə ikinci hissəyə də qol buraxmaqla start verdi. 49-cu dəqiqədə hesabı 2:2 edən ABŞ sonrakı dəqiqələrdə üstün görünürdü. Xüsusilə Kristian Pulişiçin meydana çıxmasından sonra meydan sahibləri Türkiyəyə çətin anlar yaşatdı. Amma oyunun sonlarına yaxın Montellanın komandası fəallaşdı. Hər şey heç-heçəyə doğru gedərkən əsas vaxta əlavə olunmuş 8-ci dəqiqədə Can Uzunun ötürməsindən sonra Kaan Ayhan yaxın məsafədən qələbə qolunu vurdu. Tabloda vaxt 97.50-ni göstərərkən vurulan bu qol mundial tarixində vurulan ən gec ikinci qələbə qolu oldu.

Yalnız DÇ-2022-də İranlı Rozbeh Çeşmi Uels ilə oyunda bundan daha gec fərqlənmişdi. Həmin qələbə qolu 97.56-da vurulmuşdu.

Bundan başqa Türkiyə tarixində ilk dəfə DÇ-də əzmkar qələbə qazandı. Beləliklə, qardaş ölkə necə deyərlər qapını möhkəm çırparaq mundial ilə qələbəylə vidalaşdı. Məğlubiyyətə baxmayaraq ABŞ qrupu 1-ci, Paraqvayla qolsuz bərabərliyə qalan Avstraliya isə 2-ci pillədə tamamladı.