İcarə əsasında ''Beşiktaş''da çıxış edən, amma müqavilə ilə ''Barselona''ya məxsus olan Miraləm Pyaniçin gələcək taleyi qeyri-müəyyəndi.

İspaniya mətbuatının yazdığına inansaq, bosniyalı ulduz ''Barsa''nın çalışdırıcısı Xavi Ernandesin gələcək planlarına daxil deyil. Ona görə də Kataloniya nəhəngi yayda Pyaniçi satmağa çalışacaq. ''Beşiktaş''ın onu yenidən icarəyə götürəcəyi isə inandırıcı görsənmir. Çünki məvacibi yüksək olan Pyaniçin performansı ürəkaçan deyil. Həm də yayda ''Qartal'' onsuz da yarımmüdafiə xəttini Jedson Fernandeşlə gücləndirəcək. Xatırladaq ki, İstanbul nəhəngi təcrübəli futbolçunu ötən yay transfer dönəminin son günündə heyətinə qatmışdı. ''Ağ-qaralar'' Pyaniçin ''Barsa''dakı 6,5 milyon avroya bərabər olan illik məvacibinin 2 milyon 750 min avrosunu ödəmək öhdəliyini üzərinə götürmüşdü. Amma tez-tez zədələnən futbolçu bu mövsüm superliqada 30 turun cəmi 16-da meydana çıxıb və yalnız 2 məhsuldar ötürmə ilə fərqlənib. ÇL-də isə o, 3 oyuna çıxaraq 2 məhsuldar ötürmə versə də, bunun komandaya o qədər də faydası olmadı. ''Beşiktaş'' qrupda keçirdiyi bütün oyunlarda məğlub oldu. Domenek Torrent sayəsində ''Barsa'' ilə yaxşı əlaqələri olan ''Qalatasaray''ın Pyaniçə maraq göstərdiyi deyilir. Amma ''Qalatasaray''ın bu boyda maddi yükün altına girəcəyi inandırıcı görsənmir. Pyaniçin sabiq klubu ''Yuventus''a keçmək ehtimalı da var. Bu futbolçunun ''Barsa'' ilə 2024-cü ilə qədər müqaviləsinin olduğunu da bildirək.