Sərxan Hacıyevdən soruşublar ki, “Kəpəz”lə “Turan Tovuz”un aqibəti necə olacaq, onlara nə qədər büdcə ayrılacaq?

AFFA-nın baş katibi də “hazırda biz də cavab gözləyirik. Yaxın günlərdə hamının bu barədə məlumatının olacağını düşünürəm. Bundan əlavə bir söz deyə bilmirəm” söyləyib. Ey gidi dünya. Vaxtilə qılıncının dalı da, qabağı da kəsən AFFA rəhbərliyi nə günlərə düşdü? Elxan Məmmədovu əvəzləyən adam kimdənsə cavab gözləyir... Biz belə şeylərə öyrəncəli deyilik. Hardadı Elxan bəyin qətiyyəti, səxavəti, cəsarəti? Heç kimlə hesablaşmayan, özünü Azərbaycan futbolunun yaradıcısı, qurucusu, sahibi kimi aparan belə cavabları verməzdi. Ya danışardı, deyərdi ki, filan məbləği klublara ayırarıq, filankəsi də pulun xərclənməsinə nəzarət üçün Müşahidə Şurasına sədr yollayarıq. Ya da cavabdan yayınar, heç telefonunu açmazdı. Yönəldərdilər AFFA-nın mətbuat xidmətinə. Ordan da standart bir cavab eşidilərdi. Dağdan ağır baş katib kimdənsə cavab gözləyirsə, bizimlə bir yerdə məlumatlı olacaqsa, dünyanın sonu çatıb.

AFFA ictimai rəyi azdırmaq, bölgələrdə futbolun inkişafına çalışmasının görüntüsünü yaratmaq üçün “Kəpəz”lə “Turan Tovuz”u tələm-tələsik premyer-liqaya buraxdı. Bəli, məhz buraxdı. Bütün idman prinsiplərinə, reqlamentlərə tüpürüldü. Təki tənqidlər azalsın, AFFA yaxşı əməl sahibi olsun. Bu qərarın özü qurumun tənqidlər qarşısında geri çəkilməsi, “boz bina”da oturan başbilənlərin mətbuatın sağlam tənqidləri ilə hesablaşmasının göstəricisi idi. Əvvəlki vaxtlar olsaydı, onlar əsla bizim dediyimizi etməz, tutduqlarını buraxmazdılar. İndi isə AFFA-nın gülü-çiçəyi solmaq üzrədi. Oralar çoxdandı ki, suyu sovrulmuş dəyirmana bənzəyir. “Kəpəz”lə “Turan Tovuz”u elitaya buraxıblar. Amma bununla da problemlər həll edilməyib. Əsas məsələ, həllini gözləyən ciddi problemlər bundan sonra başlayıb. Bu iki kluba minimal büdcə formalaşdırmaq üçün tələb olunan vəsait ortada yoxdu. 200-300 minlə ili yola verir, 3-4 klubu divizionda yarışdırırdılar. Elitanın tələbləri isə başqadı. Premyer-liqada ən azı gün keçirmək üçün 2 milyon manatlıq büdcəyə ehtiyac var. Həmin pul isə tapılmır. Dirəndikləri əsas məsələlərdən biri Mehman Allahverdiyevi “Kəpəz”ə yaxın buraxmamaq idi. İş o yerə gəlib çatıb ki, Allahverdiyevi kluba idman direktoru gətiriblər. Amma indi Mehman bəyin maddi imkanlarının, ətrafındakıların “Kəpəz”ə pul xərcləmək həvəsinin hansı səviyyədə olduğu qeyri-müəyyəndi.

Futbolun İnkişaf Fondu adıyla yaradılan qurumdan isə hansısa effekt gözləməyə dəyməz. Bütün gün “feysbuk”da sponsorlu reklamlar yayınlayan, potensial tərəfdaşlara bahalı konvertlərdə müraciətlər göndərən FİF-in hansısa kluba sponsor tapacağına inanmaq səhrada suyun tapılmasına inanmağa bərabərdi. Bu quruma aktyor Fəxrəddin Manafovla millət vəkili Qənirə Paşayevanı bəh-bəhlə üzv etmişdilər. Xanım millət vəkili FİF-ə hansı münasibət bəslədiyini çox tezliklə ortaya qoydu. AFFA tərəfindən fonda rəhbər göndərilən Tural Piriyev Tovuza səfər edib, İcra Hakimiyyətinin başçısı Məmməd Məmmədovla görüşə gedir. Amma özü tovuzlu olan Qənirə xanım həmin səfərdə Piriyevi müşayiət etmir, rayon rəhbərliyi ilə görüşə qatılmır. Olmaya Paşayeva Məmmədovun “Turan Tovuz”a maddi yardım etməyəcəyindən arxayın imiş, vaxtını boşa xərcləməyib?!
Allah göstərməsin, dünyamız əmin-amanlıq olsun. Amma AFFA-nın sonunun çatdığını hamımız görürük. Baş rolların ifaçıları yavaş-yavaş aradan çıxır. Ssenarini elə qururlar ki, öz uğursuzluqlarını, kadrlarının yararsızlıqlarını ört-basdır etsinlər. Boyunlarına almaq istəmirlər ki, illərdi yürütdükləri siyasət bərbad olub, əcnəbiləri futbolumuza soxuşdurmaqla bizi uçurumun dibinə sürükləyiblər. Əvvəlcə Elxan Məmmədov FİFA-ya getdi. Görünür, “yuxarılar” da onun vəzifəsindən qovulmamasına “yaşıl işıq” yandırdılar. Heç şübhəsiz, Elxan Məmmədov buna FİFA və UEFA-dakı dəstəkçiləri sayəsində nail oldu. Onun ardınca U-21 millisinin serbiyalı baş məşqçisi Milan Obradoviçlə Hakim və Hakim-İnspektorlar Komitəsinin avstriyalı sədri Frits Stuxlik yola salındı. Heç şübhə etmirəm ki, sırada Canni de Byazı, Volkan Üst və başqaları olacaq. İllərdi yazdığımız, dediyimiz sözlər həqiqətə çevrilməkdədi. AFFA-da “təmizlik” əməliyyatı başlayıb. Həmişə təmizlikdə!