Böyük ehtimalla növbəti mövsüm “Turan Tovuz” premyer-liqada iştirak edəcək.

Klubunun Muşahidə Şurasının sədri Oqtay Abdullayev saytımıza açıqlamasında bildirib ki, AFFA komanda üçün 500 min manat pul ayıracaq. Bu, mediada geniş müzakirəyə səbəb oldu. Görəsən, şəhərin iş adamları komandaya dəstək olacaq? Görünən budu ki, bu maliyyə “Turan Tovuz” üçün bəs etməyəcək. İş adamlarının dəstəyi mütləqdi. Bəs bu olacaq? Qaranlıq məsələyə aydınlıq gətirmək üçün "Turan”ın qurucusu və sabiq prezidenti Vidadi Əhmədovla əlaqə saxladıq. Tanınmış iş adamı içə klubun gələcəyi haqda söhbətləşdik.

- Vidadi bəy, “Turan Tovuz” növbəti mövsümdən premyer-liqada çıxış edəcək...
- (sözümü kəsir) Bu, dəqiqləşib? Axı İcraiyyə Komitəsinin qərarı açıqlanmayıb.

- Rəsmən açıqlanmayıb. Amma AFFA-nın icraçı vitse-prezidenti Elxan Məmmədov, baş katib Sərxan Hacıyevin müxtəlif vaxtlarda açıqlamalarından belə başa düşülür ki, həm “Kəpəz”, həm də “Turan Tovuz” növbəti mövsüm premyer-liqada iştirak edəcək.
- Bu şad xəbərə görə sizə təşəkkür edirəm.

- Klubun Müşahidə Şurasının sədri Oqtay Abdullayevlə icraçı direktoru Nadir Nəbiyev açıqlama veriblər ki, AFFA növbəti mövsüm üçün 500 min manat ayıracaq. Bu da premyer-liqada çıxış edəcək komanda üçün çox azdı. Klubun sabiq rəhbəri və rayonun tanınmış iş adamı kimi dəstək olacaqsız?
- Tək özümün buna imkanım yoxdu. Deyə bilmərəm ki, “Turan Tovuz”un maliyyə çatışmazlığını özüm həll edəcəm. Bu düzgün olmaz.

- Bəlkə digər iş adamları ilə birgə nəsə edə bilərsiz?
- Bu haqda nəsə fikirləşmək olar. Tovuzdakı imkanlı iş adamlarına müraciət etmək və onları bu işə cəlb etmək olar. Bir neçə il öncə AFFA-da olmuşdum. Elxan Məmmədovla bu haqda danışmışdım. Təəssüf ki, təklifim qəbul olunmamışdı.

- Necə təklif idi?
- 2 il öncə idi. Onda “Turan Tovuz” çempion olmuşdu. Halal zəhməti ilə premyer-liqaya gəlməyə haqq qazanmışdı. Dəqiq bilmirəm, deyəsən, klubun səhmləri AFFA-ya məxsusdu. Biz təklif irəli sürmüşdük ki, struktur dəyişikliyi olsun. Klubun səhmləri satışa çıxarılsın. 51 faiz yenə AFFA-ya məxsus olsun. Qalanı isə tovuzlu iş adamlarına satılsın. Hərə öz istədiyi qədər hissəni pul qarşılığında alsın. Bunu həm Açıq Səhmdar Cəmiyyət, həm də Qapalı Səhmdar Cəmiyyət kimi də yaratmaq olar. 51 faizlə AFFA əsas söz sahibi ola bilərdi. Burda bir məqsədimiz var idi ki, maliyyə çatışmazlığını aradan qaldıraq. Bundan əlavə, “Turan Tovuz”un gələcəkdə yaşamasına şərait yaradaq. Amma Elxan Məmmədov təklifimizlə razılaşmadı. Yenə deyirəm, nə indi, nə onda tək gücüm çatmaz ki, bir komandanı saxlayam. Sadəcə, səhmlər ala bilərəm.

- Vidadi bəy, burdan tovuzlu iş adamlarına səslənirsiz ki, komandaya dəstək olsunlar?
- Bu gün elə bir şərait yaratsalar, dostlarıma, səhmləri ala bilən adamlara deyəcəm ki, nəsə etsinlər. Özüm də hər il 10 min manat kömək edə bilərəm. Amma bu, imkandan asılıdı. Düşünürəm ki, bir neçə adam da mənə qoşular. Təki “Turan Tovuz” premyer-liqada iştirak etsin.

- Səhm satışı olmasa, “Turan Tovuz”a dəstək olacaqsız? Hər il 10 min manat verməyə hazırsız?
- Bəli! Hər il “Turan Tovuz”a 10 min manat verməyə hazıram. Lakin bu, imkandan asılı olaraq az da ola bilər, çox da.

İLKİN SULTANLI