AFFA-nın “Turan Tovuz”a ayıracağı məbləğ bəlli oldu - ÖZƏL
“Turan “Tovuz”un növbəti mövsüm premyer-liqada çıxış edəcəyi, demək olar ki, dəqiqləşib.
AFFA-ya yaxın mənbələrdən əldə etdiyimiz bilgiyə görə, “boz qurdlar”ın Müşahidə Şurasının sədri Oqtay Abdullayev bu gün assosiasiyaya baş çəkərək, artıq yolüstə olan Elxan Məmmədov və qurumun baş katibi Sərxan Hacıyevlə görüşüb. Mənbəmizin sözlərinə inansaq, Oqtay bəy əsasən 2022/23 “futbol ili” üçün kluba ayrılacaq büdcə barədə rəsmilərlə müzakirələr aparıb.
Məsələyə aydınlıq gətirmək üçün Qərb təmsilçisinin Müşahidə Şurasının sədri ilə əlaə saxladıq. Abdullayev “Football-plus.az” saytına açıqlamasında xəbəri təsdiqlədi:
“Bəli, bu gün həm Elxan Məmmədov və Sərxan Hacıyevlə görüşmüşəm. Əsas müzakirə klubun büdcəsi ilə bağlı oldu. AFFA yeni “futbol ili” üçün “Turan Tovuz”a 500 min manat ayıracaq. Ola bilsin, mövsümlərarası fasilədə dövlət tərəfindən də vəsait ayrıldı. Ancaq hələ ki 500 min manatın olacağı dəiqləşib”.
Oqtay bəy fürsətdən istifadə edib tovuzlu iş adamlarına da müraciət etməyi lazım bildi:
"Uzun illərdi tovuzlular rayonun komandasını premyer-liqada görmək istəyirdilər. Bu məsələ, demək olar, həllini tapıb, komandanın növbəti mövsümdən elitada çıxış edəcəyi gözlənilir. Klubun tarixini, hansı bölgəni təmsil etdiyini nəzərə alıb rayonun iş adamlarına müraciət etmək istəyirəm. AFFA-nın ayırdığı maliyyə ilə bəzi məsələləri həll etmək mümkün olsa da, iddialı, əzmkar komanda formalaşdırmaq üçün daha böyük vəsaitə ehtiyac duyulur. “Turan Tovuz” ölkəmizi avrokuboklarda təmsil edən ilk klub olub. Həmin ənənəni davam etdirmək üçün yardıma ehtiyacı var. Demirəm ki, kim və kimlərsə gətirib kluba milyonlar ianə etsinlər. Hər iş adamı müəyyən qədər vəsait ayırsa, “Turan Tovuz”u daha iddialı etmək mümkündü. Və mən inanıram ki, tovuzlular Tovuz klubuna biganə qalmayacaqlar və əllərindən gələn köməyi göstərəcəklər”.
RƏŞAD
